Bu il ipoteka ilə ev alanların sayı açıqlanıb

  27 Dekabr 2017    Oxunub : 477
Bu il ipoteka ilə ev alanların sayı açıqlanıb

Azərbaycan İpoteka Fondu (AİF) tərəfindən əvvəlki illərdə olduğu kimi 2017-ci ildə də əhalinin mənzil şəraitinin yaxşılaşdırılması məqsədilə uzunmüddətli ipoteka kreditlərinin verilməsi və ipoteka kreditləşməsinə maliyyə resurslarının cəlb olunması istiqamətində işlər davam etdirilib.

AzVision.az xəbər verir ki, Fondun açıqlamasında bildirilir ki, bu il Azərbaycanda 3 minə yaxın vətəndaş dövlət xətti ilə verilən ipoteka krediti hesabına mənzil problemini həll edib. Məlumatda həmçinin deyilir ki, 2017-ci ildə Fondun vəsaiti hesabına 194 mln. manat ipoteka krediti verilib. Ümumilikdə isə, qurumun fəaliyyət göstərdiyi 12 il ərzində 21 mindən artıq ailənin mənzil şəraitinin yaxışılaşdırılmasına imkan yaradılıb, verilmiş kreditlərin ümumi həcmi isə 930 mln. manata çatıb. Bunun 276 mln. manatdan çox hissəsini güzəştli kateqoriyalara aid şəxslərə verilmiş kreditlər təşkil edib.

2017-ci il ərzində Fond ipoteka istiqrazlarının emissiyası vasitəsilə 265 mln. manat məbləğində vəsait cəlb edib, dövriyyədə olan 65 mln. manat məbləğində əsas borcu üzrə ödənişlər həyata keçirilb. Ümumilikdə, 2009-cu ilin may ayından başlayaraq Fond istiqrazların 13 buraxılışını həyata keçirib, cəlb edilmiş maliyyə vəsaitlərinin məbləği 655 mln. manata çatıb. Bu vəsaitlər adi ipoteka kreditlərinin (25 ilədək müddətinə, illik 8%) maliyyələşdirilməsinə yönəldilir. Hazırda Fondun dövriyyədə olan istiqrazlarının məbləği 534,6 mln. manatdır, bu da daxili qiymətli kağızlar bazarının mühüm hissəsini təşkil edir.

2017-ci ilin dövlət büdcəsindən Fonda 50 mln. manat məbləğində vəsaitin ayrılması nəzərdə tutulub ki, artıq bu vəsait tam şəkildə Fondun hesabına daxil edilib. Ümumilikdə, 2005-2017-ci illər ərzində dövlət büdcəsindən Fonda 366 mln. manat məbləğində vəsait daxil olub.

AzVision.az

Teqlər: ipoteka