Bakıda ötən il 322 nəfər kimsəsizlər məzarlığında dəfn olunub

  22 Yanvar 2018    Oxunub : 2062
Bakıda ötən il 322 nəfər kimsəsizlər məzarlığında dəfn olunub

Azərbaycanda 2017-ci il ərzində 322 kimsəsiz dəfn olunub.

Bu barədə AzVision.az-a Bakı Şəhər Əhaliyə Vətəndaşlıq Xidməti Trestinin baş mühəndisi Sabir Həsənov məlumat verib. Onun sözlərinə görə, həmin şəxslər Hövsan qəbirstanlığında kimsəsizlər üçün ayrılan sektorda dəfn olunub.

“Kimsəsiz şəxslər bir neçə gün morqda saxlanılır. Ailə üzvləri, yaxınları tapılmadıqda həmin məzarlıqda dəfn edirlər. Bəzən dəfndən sonra ölən şəxsin yaxını olduğunu deyən şəxslər gəlir. Bunun üçün ilk növbədə qohumluq əlaqələrini sübut edən sənəd göndərirlər. Daha sonra isə biz onları sanitar, epidemioloji stansiyaya yönləndiririk. Əgər ölən şəxs xəstə olubsa, onun məzarının açılmasına icazə verilmir. Rəsmi icazə aldıqdan sonra meyiti aparıb istədikəri yerdə dəfn edə bilərlər”.

S.Həsənov qeyd edib ki, bu proses azı bir il çəkir: “Qayda belədir. Qumsal torpaqlarda bir il, nəm torpaqlarda 3 il meyiti çıxarmağa icazə verilmir. İl ərzində belə müraciət çox az olur: haradasa 1-2 nəfər”.

Aytən Zəhra
AzVision.az

Teqlər: Məzarlıq   Bakı   Ölüm