Britaniya ilə aqrar sahədə əməkdaşlıq genişlənir

  10 Mart 2020    Oxunub : 1539
Britaniya ilə aqrar sahədə əməkdaşlıq genişlənir
Kənd Təsərrüfatı Nazirliyinin dəstəyi və Böyük Britaniyanın Azərbaycandakı səfirliyinin təşkilatçılığı ilə Bakıda aqronomluq üzrə təlimlərə start verilib.
Nazirliyin İctimaiyyətlə əlaqələr və informasiya təminatı şöbəsindən Azvision.az -a verilən məlumata görə, açılış mərasimində çıxış edən Böyük Britaniyanın Azərbaycandakı səfiri James Şarp bildirib ki, dünya ölkələrinin qlobal qida çatışmazlığı ilə üzləşdiyi bir vaxtda ekoloji kənd təsərrüfatı məhsullarının istehsalı son dərəcə əhəmiyyətlidir.

Səfir qeyd edib ki, insan sağlamlığına verilən dəyər, ilk növbədə, istehsalın düzgün təşkilindən başlayır: “Aqrar iqtisadiyyat hər bir ölkənin inkişafının davamlılığının təmin edilməsi üçün son dərəcə vacib istiqamətdir. Son illər Azərbaycanda həyata keçirilən aqrar islahatları miqyasına görə yüksək qiymətləndiririk, bu islahatlar fonunda ekoloji qaydaların qorunması, istehsalda aqronomluq tələblərinə əməl edilməsi zəruridir”.

Tədbirdə çıxış edən Kənd Təsərrüfatı nazirinin müavini İlhamə Quliyeva bildirib ki, son illər ölkədə aqrar sektora dövlət tərəfindən dəstək tədbirləri genişləndirilir. Bununla yanaşı, kadrların bilik səviyyəsinin artırılması, bu sahəyə innovasiyaların gətirilməsi xüsusi diqqət mərkəzində saxlanılır:

“Ölkədə ərzaq təhlükəsizliyinin təmin olunması, məşğulluq və ixracın artırılması hazırda prioritet istiqamətlərdəndir. Azərbaycan məhsuldarlığın yüksəldilməsi üçün dəqiq əkinçiliyə keçid mərhələsindədir. Fermerlərin yeni innovativ üsulları öyrənməsi və tətbiq etməsi olduqca vacib məsələlərdəndir. Onların bilik və bacarıqlarının artırılması üçün kadr bazasının gücləndirilməsi daim diqqətdədir. Ümid edirik ki, bu təlimlərə cəlb olunmuş mütəxəssislər təlimlər zamanı əldə etdikləri bilikləri regionlarda fəaliyyət göstərən fermerlərə uğurla çatdıracaqlar”.

Tədbirdə çıxış edən beynəlxalq ekspertlər vurğulayıblar ki, Böyük Britaniya hökumətinin bu təşəbbüsü iki ölkə arasında aqrar sahədə əməkdaşlığın mühüm mərhələsi olacaq.

Təlimlərə Kənd Təsərrüfatı Nazirliyinin tabeli qurumlarının ixtisaslı mütəxəssisləri, elmi-tədqiqat institutlarının əməkdaşları, eləcə də məsləhət-informasiya xidməti göstərən təşkilatların nümayəndələri cəlb olunub. Əsas məqsəd pestisid, gübrə və bioloji qidalandırıcıların tətbiqi ilə məşğul olan təlimçilərin bacarıqlarının daha da yüksəldilməsi, bu sahədə əldə olunmuş ən son yeniliklərin onların vasitəsilə fermerlərə çatdırılmasıdır. Təlimlər üç gün Bakıda, bir gün isə Gəncə şəhərində keçiriləcək və çoxsaylı mütəxəssisləri əhatə edəcək.

Azvision.az

Teqlər: KTN