AzVision.az xəbər verir ki, “Joğovurd” nəşri orduda baş qərargah rəisinin müavini olmuş Stepan Qalstyandan keçmiş müdafiə naziri David Tonoyan əleyhinə ifadə verməsi tələbinə dair məlumat yayıb. Məqalədə qeyd edilir ki, Milli Təhlükəsizlik Xidməti ona Silahlı Qüvvələrə döyüş sursatının tədarükü ilə bağlı konkret suallar verəndə Qalstyan onun satınalma prosesindən xəbəri olmadığını deyib. O iddia edib ki, ümumiyyətlə bu mövzularla əlaqəli informasiyaya malik deyil, ona görə də onun məlum cinayət işinə bağlılığı real görünmür.

"Paşinyanla əməkdaşlıq edənlər cəzasını alacaq"- Sarkisyan

- İbtidai istintaqa zərər vurmamaq üçün Qalstyanın hüquq-mühafizə orqanlarına dedikləri barədə ətraflı informasiyaları dərc etmirik. Qeyd edək ki, Stepan Qalstyan hələ rəsmi ifadə verməyib. Amma bəzi informasiyaları artıq hüquq-mühafizə orqanlarına danışıb. İbtidai istintaq orqanı isə keçmiş müdafiə naziri David Tonoyanın ifadəsini gözləyir. Tonoyan da hələlik ifadə verməyib.

Qəzetin əldə etdiyi məlumata görə, Ermənistanın məşhur “KQB zirzəmisi”ndə saxlanılan baş qərargah rəisi müavininin səhhəti pisləşib. Onun vəkili Onik Arakelyan “Penitensiar Tibb Mərkəzi”nı Qalstyanın əməliyyat olunmaq üçün xəstəxanaya aparılması xahişi ilə müraciət edib. Mərkəz isə hələlik heç bir addım atmayıb.

Xatırladaq ki, bir müddət öncə Milli Təhlükəsizlik Xidməti vəzifə səlahiyyətlərindən sui -istifadə və külli miqdarda mənimsəmə ilə bağlı cinayət işi başladıb. Bu işdə bir neçə şəxsin adı hallanır. Keçmiş müdafiə naziri David Tonoyan, "Davo" ləqəbli Müdafiə Nazirliyinin silah tədarükçüsü olmuş David Qalstyan və Baş qərargah rəisinin müavini Stepan Qalstyana ağır iş kəsiləcəyi gözlənilir. Amma eks-nazir istintaqçılara izahat verməkdən imtina etdiyi üçün iş uzandı. Ehtimal edilir ki, məhkəmə qarşısına yeni hərbçi və məmurlar da çıxsın.

Tural Tağıyev
AzVision.az