MTX İrəvandakı 10 noyabr iğtişaşlarının təşkilatçısının adını açıqlayıb

   MTX İrəvandakı    10 noyabr iğtişaşlarının    təşkilatçısının adını açıqlayıb
  26 Yanvar 2022    Oxunub:379
2020-ci ilin noyabrın 10-da İrəvanda baş vermiş kütləvi iğtişaşlarla bağlı daha iki aksiya iştirakçısının cinayət işi üzrə istintaq başa çatıb. AzVision.az xəbər verir ki, bu barədə Ermənistan Milli Təhlükəsizlik Xidmətinin (MTX) mətbuat xidməti məlumat yayıb.
Ermənistan MTX-nin İstintaq İdarəsi kütləvi iğtişaşlar, Ermənistan parlamentinin və hökumətinin binalarına soxulma, güc tətbiq etmə, dövlət əmlakına ziyan vurma, qanunsuz silah saxlama, zorakılığa və konstitusion quruluşu, hakimiyyəti devirməyə çağırışlarla bağlı işlərə baxmağı davam etdirir.

Paşinyanın 10 noyabrda gizləndiyi yer məlum oldu
- İstintaqın məlumatına görə, “Alternativ” ictimai təşkilatının rəhbəri Narek Mantaşyan iğtişaşlar zamanı hökumət binasında olarkən etirazların coğrafiyasını genişləndirmək üçün canlı yayımda mediaya, eləcə də aksiyanın digər iştirakçılarına müraciət edib. MTX-nin məlumatına görə, o, faktları təhrif edərək, guya məmurların ölkəni tərk etməyə çalışdıqları barədə yalan informasiyalar yayıb, daha sonra insanları kütləvi şəkildə zorakılıq və əmlaka ziyan vurmaqla bağlı meydanlara çağırıb. Əsasən də o, xüsusi mühafizə olunan obyekt olan Zvartnots hava limanına gedən yolu bağlamağa çağırıb. O, həmçinin məmurların hökumət iqamətgahını və ölkədən çıxmasının qarşısını almağa çalışıb. Beləliklə, Mantaşyan kütlənin hərəkətlərini istiqamətləndirərək, onu adıçəkilən yerlərə yönəldib və şəxsən özü də Zvartnots hava limanına gedib təşkilatçı kimi cinayət planlarının həyata keçirilməsinə nəzarət edib, - yerli media MTX-nin açıqlamasından sitat gətirib.

Həmçinin qeyd edilir ki, bu cinayət əməlləri nəticəsində digər aksiya iştirakçıları, o cümlədən təqsirləndirilən şəxs G.G. əmlakın dağılması və zədələnməsi ilə müşayiət olunan iğtişaşlarda iştirak edərək hava limanına gediblər. Xüsusi nümayəndə heyətlərinin zalının qapı və pəncərəsi sındırılıb, aksiya iştirakçıları uçuş enmə zolağına daxil olaraq hərəkətdə olan təyyarəni saxlamağa cəhd ediblər.

- Bundan başqa, Mantaşyanın çağırışı ilə daha 50 nəfər hökumət binasından hökumət iqamətgahına gedərək, darvazanı sındırıb, baş nazirin malikanəsinə daxil olaraq əmlak ziyan vurublar. Burada əşyaları da oğurlayıblar. Milli Təhlükəsizlik Xidməti onu da bildirir ki, Mantaşyan hökumət binasından təxminən 55 min dram dəyəri olan Ermənistan bayrağını oğurlayıb. Narek Mantaşyan artıq həbs edilib.

Ümumi cinayət işi çərçivəsində isə 29 şəxs barəsində 10 iş ayrılaraq növbəti məhkəmə proseslərinə göndərilməsi üçün prokurora təhvil verilib,- saytlar yazıb.

Xatırladaq ki, İkinci Qarabağ müharibəsində ağır məğlubiyyətlə üzləşən Ermənistanın baş naziri Nikol Paşinyan noyabrın 10-na keçən gecə kapitulyasiya aktına imza atdığı üçün bir qrup şəxs hökumət və parlament binalarına soxularaq, o vaxtkı spiker Ararat Mirzoyanı döymüşdü. Bundan başqa strateji dövlət obyektlərini tutmağa cəhdlər edilmişdi.

Tural Tağıyev
AzVision.az

Teqlər:   Ermənistan   İğtişaş   Məhkəmə  







Xəbər lenti