Azərbaycanlı qız Moskvada şaxtadan donaraq ölüb - VİDEO

Azərbaycanlı qız Moskvada şaxtadan donaraq ölüb - VİDEO
  17 Fevral 2018    Oxunub:7036
Moskva şəhərində (Moskva vilayəti) yerləşən uşaq bağçalarından birində 4 yaşlı əslən Azərbaycandan olan qız uşağı ölü tapılıb. Hadisə 2120 saylı təhsil müəssisəsinə daxil olan bağçada səhər gəzintisi zamanı baş verib.
İlkin məlumata görə, tərbiyəçi gəzintidən sonra uşaqları binaya geri aparan zaman Zəhra Rzayeva adlı qız qrupdan geri qalıb. Tərbiyəçi onun yoxluğundan bağçada xəbər tutub. Qadın küçəyə qayıdıb və uşağı huşsuz halda yerdə uzanmış vəziyyətdə tapıb.

Müəssisə əməkdaşları bu ittihamı rədd edərək bildirirlər ki, uşaq "bioloji" səbəbdən ölüb. Qızın valideynlərinin istintaqa verdikləri məlumata görə, uşağın bədənində qançır yerləri olub.

Faktla bağlı Rusiya Cinayət Məcəlləsinin 109-cu maddəsi üzrə ("Bir şəxsin peşə öhdəliklərini səhlənkar yerinə yetirməsi nəticəsində ehtiyatsızlıqdan ölümə səbəb olma") cinayət işi qaldırılıb.



Uşağın ölümü ilə bağlı iki fərziyyə var. KİV-in məlumatına görə, tərbiyəçilər sadəcə uşağı küçədə unudublar və o, soyuqdan donaraq ölüb. Bağça əməkdaşları dindirilmə zamanı başqa bir fərziyyə səsləndiriblər. Təqribən günorta saatlarında tərbiyəçi uşaqlara gəzintinin başa çatdığını bildirib. Qrup bağçaya daxil olmağa başladıqda, qadın uşaqlardan birinin olmadığını görüb. Uşaqlar qadına bildiriblər ki, qız bir qədər əvvəl digərləri ilə oynadığı yerdə oyuncaqları evciyə yığmağa gedib.

Tərbiyəçi körpənin dalınca getdikdə, onu açıq verandada tapmayıb. Belə olan halda qadın evciyin arxasına keçib və orada qar topasının altında qızın meyitini tapıb. O, kürəyi üstə uzanmış vəziyyətdə olub.

Bağçanın həkimi uşağa ilkin yardım göstərmək istəyib. Lakin sonradan təcili yardım çağırılıb. Bu da bir nəticə verməyib. Uşaq artıq dünyasını dəyişmiş olub. Hazırda onun meyiti tibbi ekspertizaya göndərilib və ölümün dəqiq səbəbi meyit yarıldıqdan sonra bilinəcək. (Report)

AzVision.az



Teqlər: Rusiya   Azərbaycan   Zəhra   Bağça  





Xəbər lenti


Azvision.az ©2014 | Bütün hüquqları qorunur