"Əvvəllər ölkənin gücü onun nefti, qazı ilə ölçülürdü"

  13 Mart 2018    Oxunub : 609
"Əvvəllər ölkənin gücü onun nefti, qazı ilə ölçülürdü"
“İpək Yolu sadəcə nəqliyyat yolları kimi nəzərdən keçirilə bilməz. Bu yolun başqa mühüm əhəmiyyətləri də var. Əvvəllər ölkələrin gücü onun nefti, qazı ilə ölçülürdü. Lakin sonradan bu tendensiya fərqli oldu. Bu gün dünyada nəqliyyat sahəsinin gəlirləri 5.5 trilyon dollarla ölçülür. Gələcəkdə ümumi daxili məhsulların gətirdiyi gəlirlərin 75 faizi nəqliyyat sektorunun payına düşəcək. Dövlətlərin inkişaf səviyyəsi daha çox nəqliyyat sektorlarından asılıdır”.
AzVision.az xəbər verir ki, bunu “İpək Yolu boyunca iqtisadi əməkdaşlıq və mədəni əlaqələrin inkişaf etdirilməsində parlament üzvlərinin rolu” mövzusunda beynəlxalq konfransda çıxışı zamanı Qara Dəniz İqtisadi Əməkdaşlıq Təşkilatı Parlament Assambleyasının baş katibi Asəf Hacıyev bildirib. Onun sözlərinə görə, Bakı-Tbilisi-Qars dəmir yolu Böyük İpək Yolunun bir hissəsi kimi fəaliyyət göstərəcək.

TANAP və TAP layihələrinə baxaq. Bu iki boru kəməri Avropanın enerji təhlükəsizliyi mənbəyi kimi nəzərdən keçirilir. İpək Yolu təkcə neft-qaz ötürülməsi ilə bağlı deyil, burada başqa məsələlər də var. Qara dəniz hövzəsi baxımından da İpək Yolunun böyük əhəmiyyəti var. Mən ATƏT Parlament Assambleyası ilə baş katibi olduğum təşkilatın İstanbulda birgə tədbir keçirilməsini təklif edirəm. Bu, çox əhəmiyyətli olar”-deyə A.Hacıyev qeyd edib.

Baş katib bildirib ki, dünyaya sülh, təhlükəsizlik gətirmək əsas öhdəliklərdir: “İpək Yolu bizi ayırmamalı, birləşdirməlidir”.

Eldar Tanrıverdiyev
AzVision.az

Teqlər: Baş-Katib   İpək-Yolu   TANAP   TAP