“Əsas məsələ fermerlərə yaxın olmaqdır” - İnam Kərimov

“Əsas məsələ fermerlərə yaxın olmaqdır” - İnam Kərimov
  05 İyun 2018    Oxunub:1782
“Azərbaycanın dövlət siyasətinin əsas prioritetlərindən biri kənd təsərrüfatını inkişaf etdirməkdən ibarətdir. Burada əsas məsələ layiqli idarəçilik və fermerlərə yaxın olmaqdır”.
AzVision.az xəbər verir ki, bunu Kənd təsərrüfatı naziri İnam Kərimov Avropa İttifaqı-Azərbaycan biznes forumunda çıxışı zamanı deyib. O, qeyd edib ki, nazirliyin gündəliyindəki əsas məsələ budur və nazirlik fəaliyyətini 5 prinsip əsasında qurur:

“Bunlardan biri analitik yoldur. Həmçinin innovasiyaları kənd təsərrüfatı sahəsinə gətirərək fermerlərə yardımçı oluruq. Onlara kreditlər, subsidiyalar, aqrolizinqlər vasitəsilə yardım edir, dəstəkləyirik. Kənd təsərrüfatı möhkəm təhsil sisteminə əsaslanmalıdır. Bu sahədə təhsilin təkmilləşdirilməsinə çalışmalıyıq. Həmçinin ticarətə rəvac verməliyik. İstehsalçı və istehlakçıları bir araya gətirməliyik. Dayanıqlı kənd təsərrüfatından danışırıqsa, əsas məsələlər bununla ölçülür”.

Nazir əlavə edib ki, Avropa İttifaqı ölkələri ilə Azərbaycan arasında sıx əməkdaşlıq mövcuddur: “Kənd təsərrüfatı sahəsində əməkdaşlığın prioriteti Avropa İttifaqı coğrafiyasını nəzərdə tutur. 2017-ci ildə Aİ ölkələrindən 1.9 milyardlıq məhsul idxal edilib, 7,4 milyardlıq məhsul isə ixrac edilib. Kənd təsərrüfatında isə bu göstəricilər çox azdır. Yəni strateji məqsədimiz ondan ibarətdir ki, kənd təsərrüfatı məhsullarının Azərbaycandan Avropaya ixracını və Avropadan Azərbaycana bu məhsulların idxalını artıraq. Hesab edirəm ki, kənd təsərrüfatı Avropa biznes qurumları üçün çox vacib bir sahədir”.

Elvin Abdulla
AzVision.az


Teqlər:   Azərbaycan   İxrac  





Xəbər lenti