Komitədən yeni sosial kampaniya

  16 İyul 2018    Oxunub : 1440
Komitədən yeni sosial kampaniya
Əmlak Məsələləri Dövlət Komitəsi (ƏMDK) “Əmlakını qeydiyyata al və mülkiyyətinə sahib ol” adlı yeni sosial kampaniyaya start verib.
Komitənin mətbuat xidmətindən AzVision.az-a bildiriblər ki, tədbir “Vətəndaş xidmətin məkanında deyil, xidmətin vətəndaşın yanında” hədəfinə uyğun olaraq keçirilir. Kampaniya daşınmaz əmlaka dair qeydiyyat xidmətlərini əhaliyə daha da yaxınlaşdırmaqla bu sahədə əlçatanlığı artırır. Məqsəd daha şəffaf şəkildə əmlaklara dair kütləvi sənədləşmənin həyata keçirilməsi, ünvana çatdırılan ictimai xidmətlərdən əhalinin geniş təbəqəsinin yararlanması, o cümlədən leqal və etibarlı əmlakların sayının artırılmasıdır. Eyni zamanda vətəndaş məmnunluğunun maksimum səviyyəyə çatdırılması, çevikliyin və operativliyin təmin olunması da əsas vəzifələrdəndir.

Belə ki, bu sosial layihə ardıcıl olaraq respublikanın bütün ərazilərini əhatə edəcək. Öncədən elan edilən məkanda fəaliyyət göstərəcək mobil ofislər vətəndaşların xidmətində olacaq. Sakinlər ərazi idarələrinə getmədən bu mobil ofislərə müraciət etməklə səyyar şəkildə qeydiyyat xidmətlərindən yararlana biləcəklər. Bununla bağlı vətəndaşlar əvvəlcədən KİV vasitəsilə məlumatlandırılacaqlar.

Bu kampaniya iyulun 16-da Abşeron rayonun Ceyranbatan qəsəbəsində reallaşıb. Belə ki, sakinlər 16-20 iyul tarixlərində saat 09:00-dan 17:00-a qədər Ceyranbatan qəsəbəsinin 20 Yanvar küçəsi, 1 ünvanında fəaliyyət göstərən komitənin mobil ofislərinə yaxınlaşa bilərlər. Kampaniyanın əhatə etdiyi ərazi sakinlərinin səyyar qaydada bütün növ daşınmaz əmlak üzrə qeydiyyat xidmətlərindən yararlanmaq imkanı var. Başqa sözlə Abşeron rayonunun Ceyranbatan qəsəbəsinin əhalisi qeyd edilən tarixdə və vaxtda göstərilən ünvanlarda fəaliyyət göstərən mobil ofislərə müraciət edə bilərlər.

Vətəndaşlar komitənin rəsmi internet saytına (emdk.gov.az) daxil olaraq “Əmlakın qeydiyyatı kalkulyatorundan” istifadə etməklə qeydiyyat apardığı əmlakının parametrlərindən asılı olaraq dövlət rüsumunu və xidmət haqqını əvvəlcədən öyrənə bilərlər.

Kampaniya çərçivəsində sakinlərə daşınmaz əmlakın qeydiyyatı ilə bağlı lazımi məlumatları özündə əks etdirən informasiya bukletləri və bildirişlər paylanılıb.

Belə mobil ofislər vasitəsilə əmlaklar daha sadə və innovativ üsullarla sənədləşdiriləcək. Bu kampaniyalar vətəndaşların qeydiyyat orqanı ilə birbaşa ünsiyyətini təmin edəcək, digər kənar əlaqələrin aradan qaldırılmasına imkan verəcək. Qeydiyyat sahəsində az vaxtla çox iş görüləcək. Bununla da sənədləşmə əhalinin geniş kütləsini əhatə edəcək, qeydiyyat xidmətləri daha da sürətli yerinə yetiriləcək, o cümlədən daşınmaz əmlak bazarında leqal əmlakların sayı artırılacaq, bu sahədə dinamika yüksələcək.

Əmlak çıxarışlarının daha sürətli verilməsi müasir həyatımızın əsas çağırışlarından olan sürətli proseslərə və biznes əməliyyatlarına tələbatın ödənilməsinə də imkan verəcək. Belə ki, bu daşınmaz əmlakın qeydiyyatı sahəsində xidmətlərin keyfiyyətinin və səmərəliliyinin artmasına, daha çox insanın rahatlıqla mülkiyyət üzərində hüquq sahibi olmasına şərait yaradır.

Qeyd edilməlidir ki, qeydiyyatla bağlı sənədləri mobil ofislərlə yanaşı, ərazi idarələrinə də təqdim etmək olar.

AzVision.az

Teqlər: ƏMDK