AzVision.az xəbər verir ki, prezident İlham Əliyevin "Azərbaycan Respublikasında sahibkarlığın inkişafına dövlət dəstəyi mexanizminin təkmilləşdirilməsi haqqında" fərmanına əsasən, Sahibkarlığın İnkişafı Fondu publik hüquqi şəxsin təsis edilməsində məqsəd sahibkarlığın inkişafına dəstək mexanizminin təkmilləşdirilməsi, qeyri-neft sektorunda innovativ texnologiyalara əsaslanan yeni istehsal, emal və infrastruktur müəssisələrinin yaradılması, ixrac əməliyyatlarının maliyyələşdirilməsi, real sektora investisiya qoyuluşlarının sürətləndirilməsi və özəl sektorda fəaliyyət göstərən təsərrüfat subyektlərinin maliyyə resurslarına çıxış imkanlarının genişləndirilməsidir.

Həmin fərmanın digər bəndinə əsasən Azərbaycan Respublikasının Sahibkarlığa Kömək Milli Fondu ləğv edilib. Azərbaycan Respublikası Sahibkarlığın İnkişafı Fondunun Nizamnaməsi və vəsaitindən istifadə Qaydası təsdiq edilib.

Fondun fəaliyyətinə ümumi rəhbərliyi və nəzarəti həyata keçirmək üçün ictimai əsaslarla fəaliyyət göstərən 9 nəfərdən ibarət Müşahidə Şurası yaradılıb. Müşahidə Şurasının 5 üzvünü Azərbaycan Respublikasının İqtisadiyyat Nazirliyi, 4 üzvünü isə Maliyyə Nazirliyi; Vergilər Nazirliyi; Əmək və Əhalinin Sosial Müdafiəsi Nazirliyi; Maliyyə Bazarlarına Nəzarət Palatası (hər qurumdan bir nəfər olmaqla) təyin edirlər. Fondun nizamnamə fondu 1 094 254 581 manatdır və ona verilmiş əmlakdan, habelə dövlət büdcəsindən ayrılan vəsaitdən formalaşır.

AzVision.az