“Yaşıl kart” sistemi üzrə 6 aylıq statistika

  30 İyul 2019    Oxunub : 1146
“Yaşıl kart” sistemi üzrə 6 aylıq statistika
Bu ilin yanvar-iyun aylarında “Yaşıl Kart” sistemi çərçivəsində fəaliyyət göstərmək hüququ olan sığortaçılar tərəfindən 18 min 837 sığorta şəhadətnaməsinin satışı həyata keçirilib. Bu, ötən ilin eyni dövrünün göstəricisi ilə müqayisədə 16 faiz artım deməkdir.
İcbari Sığorta Bürosundan (İSB) Azvision.az -a verilən məlumata görə, yarım ildə “Yaşıl Kart” beynəlxalq sığorta müqavilələri üzrə sığorta şirkətləri tərəfindən toplanmış sığorta haqları 1 milyon 359 min 162 manat təşkil edib. Bu da ötən ilin müvafiq dövrü ilə müqayisədə 15 faiz çoxdur.

Hesabat dövründə sığorta hadisələrinin sayı da keçən ilin eyni dövrü ilə müqayisədə 5,8 faiz artaraq 219-a çatıb.

İlin birinci yarısında İSB tərəfindən “Yaşıl Kart” sistemi çərçivəsində sığorta tələbləri ilə bağlı 72 iş üzrə icraat davam etdirilib. İcraatda olan işlərin sayında ötən ilin müvafiq dövrü ilə müqayisədə 42 faiz azalma olub. Bu, öz növbəsində, İSB-in “Yaşıl Kart” sistemi çərçivəsində hadisələr üzrə sığorta ödənişləri ilə bağlı daha operativ fəaliyyət göstərməsinin nəticəsidir.

Hazırda “Yaşıl Kart” sığorta növü üzrə İcbari Sığorta Bürosunun iştirakçıları olan 12 sığorta şirkəti fəaliyyət göstərir.

Azvision.az

Teqlər: Yaşıl-Kart   Statistika