Ordumuzun məhv etdiyi polkovnik: Şakaryan 90-cı illərin hərbi canilərindən olub

   Ordumuzun məhv etdiyi polkovnik:   Şakaryan 90-cı illərin hərbi canilərindən olub
  09 Dekabr 2021    Oxunub:3172
Ermənistan mediası Azərbaycan Ordusunun Qarabağda məhv etdiyi “məşhur” polkovnik Sergey Şakaryan haqqında məqalə dərc edib. Şakaryanın oğlu ilə söhbətləşən jurnalist bir sıra maraqlı məqamları üzə çıxarıb.
Məlum olub ki, qəhrəman hərbçilərimiz nəinki erməni ordusunun “perspektivli” yüksək rütbəli zabitini aradan götürüb, hətta onun ailəsini yığdığı varidatdan da məhrum edib. Belə ki, Sergeyin Hadrutda evi, maşını və digər mülkləri olub. AzVision.az işğalçı ordunun 18-ci motoatıcı diviziyasının qərargah rəisi olmuş Şakaryanla bağlı bəzi maraqlı məqamları təqdim edir.

- Artıq iki ildir ki, ailəsi Şakaryana baş çəkməyə gedir. Amma hərbi hissəyə deyil, onun basdırıldığı Yerablur panteonuna. Polkovnik Sergey Şakaryan 30 il Ermənistan silahlı qüvvələrində xidmət edib, 24 medal alıb. Oğlu deyir ki, ilk günlərdə atasıyla əlaqə saxlaya bilmirmiş. Müharibə zamanı görüşə bilməyib.

Bu il general olacaqdı, Şuşada məhv edildi
“Birbaşa əlaqəmiz də yox idi. Amma sürücüsünün nömrəsini öyrəndim və onun telefonu ilə danışdıq. Birinci gün atamın səsi kəsildi və mən heç nə başa düşmədim. Atam yeniyetmə olan zaman Birinci Qarabağ müharibəsində də iştirak edib. Ali hərbi məktəbi bitirdikdən sonra-18 yaşında zabit olub”,- polkovnikin oğlu Slava deyib.

Məqalədə qeyd edilir ki, Şakaryan ölümündən bir gün əvvəl zəng vuraraq oğlundan ehtiyatlı olmasını xahiş edib. Daha sonra ailəsiylə əlaqə saxlayacağına söz versə də, bu baş verməyib. Qəhrəman hərbçilərimizin keçirdiyi əməliyyat nəticəsində hərbi cani məhv edilib.

- O, oktyabrın 25-də 46 yaşında öldürüldü. Slava atasının ölümündən bir saat sonra sürücüsündən xəbər tutsa da, ailəyə ertəsi gün məlumat verib. Ailə hər şeyini itirib Hadrutdakı evi, avtomobili və başqa mülkləri.

Qeyd edək ki, erməni mediası silahlı qüvvələrin 18-ci motoatıcı diviziyasının qərargah rəisi olmuş Şakaryanın general rütbəsi almağa əsas namizədlərdən biri kimi təqdim edib. Bildirilir ki, əgər Sergey müharibədə öldürülməsəydi, guya erməni ordusu üçün xeyli xeyir verəcəkmiş. Azərbaycan hərbçiləri isə işğalçı ordunun “perspektivli” polkovnikinin general olmaq arzusunu gözündə qoyub.



18 yaşında Birinci Qarabağ müharibəsinə qoşulmuş Şakaryan silahsız azərbaycanlılara qarşı qəddarlığı ilə də seçilib. Onun atası isə Birinci Qarabağ savaşında öldürülüb. Şakaryan ötən ilin oktyabrın 4-də saxta “artsax qəhrəmanı” adını da alıbmış.

Xatırladaq ki, Azərbaycan Müdafiə Nazirliyi 2020-ci ilin oktyabrın 27-də Xocavənd, Füzuli və Qubadlı istiqamətlərində düşmən darmadağın edildiyini, əks-hücumla Ermənistan silahlı qüvvələrinin 18-ci motoatıcı diviziyasının ön idarəetmə məntəqəsinin məhv edildiyini açıqlamışdı. Həmin zaman bildirilmişdi ki, ölənlər arasında diviziyanın qərargah rəisi polkovnik Sergey Şakaryan da var.

Tural Tağıyev
AzVision.az

Teqlər:   Ermənistan   Polkovnik   General   Hadrut   Yerablur  







Xəbər lenti