Aksiyada valideynlərin nümayəndəsi kimi çıxış edən vəkil Norayr Norikyanın jurnalistlərə verdiyi məlumata görə, etirazçılar övladlarının ölümü ilə bağlı rəsmi versiyaya inanmırlar. Onlar dərin və hərtərəfli araşdırma aparılmasını tələb edirlər.

“Qohumlar baş nazirlə görüş, o cümlədən faciənin təfərrüatları və səbəblərindən tutmuş, hadisənin baş vermə şəraitinin aydınlaşdırılmasına məsul olan strukturların araşdırmalarına qədər olan prosesləri dəqiqləşdirməyi tələb edirlər”, - Norikyan deyib.

İrəvanda əsgər valideynləri etiraz aksiyaları keçirirlər - VİDEO

Vəkil qeyd edib ki, “Bizdə təkzibolunmaz məlumatlar var ki, gecə saat 00:15 və 00:30-da əsgərlərlə yaxınları arasında telefon bağlantıları olub, mesajlar gəlib. Ona görə də uşaqların 22:30-da yatdıqdan sonra yanıb ölmələri ilə bağlı açıqlama böyük mübahisə doğurur”.

O, xüsusi olaraq vurğulayıb ki, əgər bir və ya iki əksər xilas edilibsə, qalan 15-ni niyə eyni qaydada kazarmadan çıxara bilməyiblər?

- Bizə məlum olub ki, orada yanğından əvvəl sağ adam olmayıb. Baş verənlərə görə məsul şəxslər cavabdehdirlər və mən zərərçəkmişlərin qəyyumu kimi bu faciənin, cinayətin açılmasını tələb edirəm, - vəkil deyib.

Xatırladaq ki, yanvarın 19-na keçən gecə, saat 01:30 radələrində Ermənistanın Basarkeçər rayonunun Azad kəndində yerləşən N saylı hərbi hissədə yanğın baş verib. Nəticədə 15 erməni hərbçisi həlak olub, daha üç əsgər isə ölümcül xəsarətlər alıb. Hadisəyə görə korpus komandiri vəzifədən qovulub. Bundan başqa, daha 10-a yaxın zabitin də vəzifədən uzaqlaşdırılması barədə məlumat yayılıb.

Həmçinin, sözügedən hərbi hissənin arxa bölməsinin rəisi, briqada komandirinin kommunal xidmət üzrə müavini, polkovnik-leytenant Qor Agekyan saxlanılıb. Ölən əsgərlərin yaxınları isə hökumətin səsləndirdiyi təsadüfi yanğın versiyasına inanmırlar.

Tural Tağıyev
AzVision.az