Aysel Əliyeva

Keçən gün yerli kanallardan birində `Xəbərlər`i izləyərkən aparıcı xanımın təqdim elədiyi bir xəbərlə bütün ensklopedik bilgilərim alt-üst oldu. Yaxınımda oturan anama tərəf dönüb: “Niva adlı ölkə var ki?”,- deyə soruşdum. Anam ən az mənim qədər təəccüb dolu halıyla: “Niva dedi həqiqətən də...”,- söylədi. Yaşadığımız şoku təxmin edin...

Bacımızın deməyə çalışdığı ölkənin adı Livan idi.

Sadəcə, bizim medianın yazılmamış xəbər spikerliyi qanununlarına müvafiq olaraq, aparıcının üzünə, səsinə qatdığı `zəhrimar`ın dozası o qədər çox olub ki, intonasiyası `Livan`ı `Niva` kimi çatdırdı.

Doğrudan, görəsən bizimkiləri kim inandırıb ki, xəbər aparıcısı Osmanlı cəlladlarının surətində olmalıdır?!

Demək olar ki, bütün kanallarımızdakı bütün xəbər aparıcıları eyni tərzdədir. Baxırsan `Ana Xəbər` bülletenində maneken kimi, burnu əməliyyatlı, dodağı dolğulu, `full` makiyajda, 20-25 yaşlarında bir qız, səsinin ən kontralt hissəsinə salaraq, izləyicinin üstünə qışqırır.

Ya da eyni şəkildə sütül dəliqanlılar `Filan ölkənin filan vilayətində, filankəs bəhmənkəsi döyüb` başlıqlı xəbəri elə çatdırırlar ki, az qalırsan televizor qarşısında yastıqla özünü müdafiə edəsən. Mübaliğə-filan etmirəm, vallah, vəziyyət belədir. O dərəcədə ki, ekrana “Mən günahsızam!” deməyi gəlir insanın...

Axı dünya təcrübələri var.
Axı xəbər spikerliyi `bolşe zəhrimara` söhbəti deyil.
Axı izləyici xəbəri alarkən aparıcının ego partlamasını seyr etməyə məcbur deyil.

Özəlliklə də “Ana Xəbər” buraxılışı 20-25 yaşlı həyəcanlı, növrəstə cavanların yeri deyil, məncə.

İnternet çağındayıq, bir toxunuşla digər ölkələrin xəbər spikerlərini izləmək şansımız var. Və eyni zamanda onlardan örnək götürmək...
Həmin ölkələrdə `Ana Xəbər`i yaşı 40-ın üstündə olan qadınlar, kişilər aparır.
Özü də son dərəcə təmkinli, sakit;
Mimikalardan və jestlərdən yeri gəlmədikcə istifadə etməyən;
Kamera ilə baxışırkən izləyicini `yeməyən`;
Əllərini-qollarını-bədənini sabit saxlamağı bacaran;
Sadə makiyajlı, sadə görünümlü;
Jurnalistika təcrübəsi bizim aparıcıların yaşı qədər olan;
Təqdim elədiyi xəbərlər haqqında fikir sahibi;
Əksərən gözəl olmayan qadın və kişilər...

Onlardan alınan xəbərlə bizim aparıcılardan alınan xəbər arasında ciddi fərq var.
Niyəmi?!

Xəbəri oxuyarkən `necə eləsəm, ekranda daha sərt və gözəl görünsəm` qayğısıyla qəddarca qışqıran bəzəkli gözəllərlə, ölkəsində və dünyada baş verən hadisələri ən səmimi duyğularıyla - yeri gələndə gözündən yaş süzülərək, yeri gələndə qəhqəhələrə boğularaq, yeri gələndə təəccübdən gözləri daş dəymiş qurbağının gözləri kimi açılan, göstərişsiz xəbər spikerlərinın çatdırdığı xəbər arasında sizcə, fərq yoxdur?!..