Milli Qəhrəmanlar İlham Əliyevin namizədliyini dəstəkləyir

  23 Fevral 2018    Oxunub : 4978
Milli Qəhrəmanlar İlham Əliyevin namizədliyini dəstəkləyir
Azərbaycanın Milli Qəhrəmanlarının görüşü keçirilib.
Dövlət Təhlükəsizliyi Xidmətinin İctimai əlaqələr şöbəsindən AzVision.az-a verilən məlumata görə, görüşdə Azərbaycanın müstəqilliyi və ərazi bütövlüyü uğrunda şücaət, igidlik və rəşadət nümunələri göstərmiş Milli qəhrəmanlarımız ölkəmizin yaxın tarixinə nəzər salaraq, Azərbaycanın son illərdə əldə etdiyi nailiyyətlərdən danışıblar.

Qeyd olunub ki, Azərbaycan müstəqilliyini bərpa etdikdən sonra xalqımıza nəsib olmuş azadlığın yüksəkliyində dayana bilməyən ozamanki hakimiyyət tarixin millətimizə bəxş etdiyi bu əvəzsiz sərvəti nə lazımınca qiymətləndirə, nə də onu qoruyub saxlanmaq iqtidarında olublar. Həmin dövrdə ölkəyə rəhbərlik edənlərin naşılığı və bacarıqsızlığı üzündən yaranan fəlakətli vəziyyət xalqımızı ağlasığmaz məhrumiyyətlərə düçar edib.

1991-1993-cü illər nəinki dövlətimizin müstəqillik tarixində itirilmiş illər hesab olunur, həm də bu illərdə Azərbaycan “olum, ya ölüm” seçimi qarşısında qalıb. Ölkədə yaranmış xaos, anarxiya və hərc-mərclikdən məharətlə istifadə edən erməni işğalçıları xarici havadarlarının dəstəyi ilə əzəli və tarixi torpaqlarımızı qəsb edir, digər tərəfdən isə ölkə daxilində hakimiyyət uğrunda çəkişmələr vətəndaş müharibəsinə gətirib çıxarıb. Xalqımız belə bir ümidsiz vəziyyətdə imdad dolu nəzərlərini dahi şəxsiyyət Heydər Əliyevə dikib.

Bu çətin məqamda ulu öndərimiz Heydər Əliyev həmişə olduğu kimi, xalqının harayına çataraq, məhv olmaq təhlükəsi ilə üz-üzə qalan Azərbaycanda az bir zamanda mürəkkəb, ziddiyyətli, son dərəcə gərgin hadisələri öz dühası və müdrikliyi ilə yoluna qoymuş, dövlətçiliyimizi məhv olmaqdan xilas edib. Ümummilli Liderin qətiyyəti, yenilməz iradəsi, zəngin dövlətçilik təcrübəsi sayəsində Azərbaycan vətəndaş müharibəsi, qardaş qırğını, dövlət çevrilişləri girdabından qurtularaq, müstəqilliyini qorumuş, respublikamız intibaha qovuşub.

Milli qəhrəmanlar bildiriblər ki, bu gün ümummilli lider Heydər Əliyevin müstəqil dövlətçilik xəttini uğurla davam etdirən möhtərəm Prezident Zati-aliləri cənab İlham Əliyevin müdrik rəhbərliyi sayəsində Azərbaycan mübaliğəsiz öz tarixinin ən güclü dövrünü - ictimai-siyasi sabitlik, sosial-iqtisadi yüksəliş və təhlükəsizlik şəraitində yaşayır. Möhtərəm Prezident cənab İlham Əliyevin ölçülüb-biçilmiş və düşünülmüş müstəqil dövlətçilik strategiyası, milli mənafelərə xidmət edən, son dərəcə cəsarətli daxili və xarici siyasət kursu sayəsində regionun lider dövlətinə çevrilmiş Azərbaycan Respublikası bütün çətinliklərə mətanətlə sinə gərir, sınaqlardan dəyanətlə çıxır, öz tərəqqi xəttini, hər bir sahədə sabitliyi, yüksək iqtisadi inkişaf tempini qoruyub saxlaya bilir. Bunun nəticəsidir ki, Azərbaycanda xalq-iqtidar həmrəyliyi gündən-günə daha da möhkəmlənir, ölkəmizin beynəlxalq nüfuzu və mövqeləri getdikcə güclənir.

Silahlı Qüvvələrin Ali Baş Komandanı cənab İlham Əliyevin misilsiz səyləri ilə respublikanın müdafiə qabiliyyətinin durmadan artdığını vurğulayan Milli qəhrəmanlar Silahlı Qüvvələrin hərbi-texniki potensialının yüksəldilməsi nəticəsində Azərbaycan Ordusunun dünyanın ən güclü ordularından birinə çevrildiyini bildiriblər. Milli qəhrəmanlar qeyd ediblər ki, işğal olunmuş ərazilərimizin möhtərəm Prezident, Silahlı Qüvvələrin Ali Baş Komandanı cənab İlham Əliyevin müdrik rəhbərliyi ilə tam azad ediləcəyi gün heç də uzaqda deyil: "Biz hamımız bir əsgər olaraq dövlətimizin başçısının ölkəmizin ərazi bütövlüyünün təmin olunması barədə hücum əmrinə tam hazırıq. 2016-cı ilin aprel döyüşlərində Azərbaycan Ordusu rəşadətli döyüş əməliyyatı ilə bu hazırlığı bir daha təsdiq etmişdir".

Milli qəhrəmanlar xüsusi vurğulayıblar ki, möhtərəm Prezident cənab İlham Əliyev və Birinci vitse-prezident xanım Mehriban Əliyeva tərəfindən Vətən, dövlət, xalq, Azərbaycanın müstəqilliyi, ərazi bütövlüyü və tərəqqisi uğrunda mübarizədə yenilməz rəşadət və misilsiz vətənpərvərlik nümunələri göstərmiş Milli qəhrəmanlara, habelə müharibə əlillərinə, şəhid ailələrinə yüksək diqqət və qayğı göstərilir. Dövlətimizin başçısının 2018-ci il fevralın 20-də imzaladığı Azərbaycanın Milli Qəhrəmanı adına layiq görülmüş şəxslərin və onların ailə üzvlərinin sosial müdafiəsinin daha da gücləndirilməsi ilə bağlı Sərəncam buna əyani sübutdur.

Milli qəhrəmanlar bildiriblər ki, möhtərəm Prezident cənab İlham Əliyevin ətrafında daha da sıx birləşərək, dövlətimizin başçısının Azərbaycanın müstəqilliyinin qorunması və tərəqqisi istiqamətində bütün səylərinin uğurla həyata keçirilməsində daim ön sırada olacaqlar. Görüş iştirakçıları 2018-ci il aprelin 11-də ölkəmizdə keçiriləcək prezident seçkilərində yekdilliklə İlham Əliyevin namizədliyini dəstəkləyəcəklərini bəyan ediblər.

Sonda Milli qəhrəmanlar prezident seçkiləri ilə bağlı müraciət qəbul etmişlər.
Milli qəhrəmanlar müraciətdə vətəndaşlarımızı aprelin 11-də keçiriləcək prezident seçkilərində fəal iştirak etməyə, müstəqil Azərbaycanın inkişafı və qüdrətlənməsi, xalqımızın gələcək rifahı naminə İlham Əliyevə səs verməyə çağırıblar.

AzVision.az

Teqlər: DTX   Milli-qəhrəman