AzVision.az xəbər verir ki, fevralın 7-də Ceyranbatan qəsəbəsi Nərimanov küçəsində naməlum şəxslər gecə saat 01 radələrində 36 yaşlı Könül Sahibovanın yaşadığı evə soxulub. Qadının evdə tək olmasından istifadə edən həmin şəxslər ikinci mərtəbənin pəncərəsindən mənzilə daxil olub və qadına hücum edib. Onlar zor tətbiq etməklə K.Sahibovanın əl və ayaqlarını bağlayıb, həmçinin ağzına yapışqanlı lent yapışdırıb. Bıçaqla hədə-qorxu gələn, pul və qızıl tələb edən naməlum şəxslər mənzildən 50 manat və dəyəri 300 manat olan qızıl sırğaları götürərək qaçıb.

Faktla bağlı Abşeron rayon Polis İdarəsində Cinayət Məcəlləsinin 181.2.3-cü (quldurluq, yaşayış sahəsinə, habelə binaya, anbara və ya başqa saxlanc yerlərinə qanunsuz olaraq girməklə törədildikdə) və 181.2.5-ci (quldurluq, silah və ya silah qismində istifadə edilən əşyalar tətbiq edilməklə törədildikdə) maddələri ilə iş başlanılıb. Baş Cinayət Axtarışı İdarəsi və Abşeron RPİ əməkdaşlarının keçirdikləri əməliyyat-axtarış tədbirləri nəticəsində quldurluğu törətməkdə şübhəli bilinən Ceyranbatan qəsəbə sakinləri, əvvəllər məhkum olunmuş Elnur Axundov və Rafiq Ağayev saxlanılıb.

AzVision.az