Masallıda 20 yaşlı gəlinin müəmmalı intiharı

  16 May 2018    Oxunub : 1618
Masallıda 20 yaşlı gəlinin müəmmalı intiharı
Masallıda intihar hadisəsi baş verib. Rayon sakini 1998-ci il təvəllüdlü Nəzərova Aytən Mirdamət qızı özünü asaraq intihar edib.

Miyankü kənd inzibati ərazi dairəsi üzrə icra nümayəndəsi Xəlil Məmmədov AzVision.az-a 20 yaşlı Aytənin intiharında müəmmalı durumun olduğunu deyib.
Onun sözlərinə görə, intihar edən gəlinin ailəsində problem olmayıb: “Gəlinlə qayınana və qayınata arasında ciddi problem görməmişik. Onlara "ana", "ata" deyib. Maddi imkanları da normaldır. Evləri, maşınları var. Maddi baxımdan hər şey qaydasındadır. Onun ölüm səbəbi ailəsi üçün də müəmmalıdır”.

X.Məmmədov hadisənin mayın 14-də, saat 8-radələrində baş verdiyini bildirib: "Bizə məlumat saat 09:00-da daxil olub. Canına niyə qəsd etdiyini heç kim bilmir. İntihar etməsi üçün ciddi problemləri də olmayıb. Heç kimin ağlına gəlməzdi ki, Aytən belə bir iş tutar. Hadisə araşdırılır, yəqin səbəb bilinəcək”.

Qeyd edək ki, faktla bağlı rayon prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi başlanılıb, istintaq davam etdirilir.

Şahanə Rəhimli
AzVision.az

Teqlər: Masallı   İntihar