Ermənistan hökuməti laçınlı köçkünlərin pulunu vermir

  22 May 2018    Oxunub : 3009
Ermənistan hökuməti laçınlı köçkünlərin pulunu vermir
Ötən ilin dekabrında Avropa İnsan Haqları Məhkəməsinin Böyük Palatası “Çıraqov və başqaları Ermənistana qarşı” işi üzə qərar çıxarıb. Qərara əsasən, Ermənistan hökuməti vurduğu maddi və mənəvi ziyan qarşılığında 6 şikayətçinin hər birinə 5 min avro və ümumi xərclər üçün 28 642 funt-sterlinq ödəniş etməlidir. Ermənistan hökumətinə təzminatın ödənilməsi üçün 3 ay vaxt verilib.
Laçın rayonundan məcburi köçkün düşmüş Fəxrəddin Paşayev AzVision.az-a bildirib ki, Avropa İnsan Haqları Məhkəməsi tərəfindən Ermənistana verilən 3 ay vaxt bitsə də, hələ kompensasiya onların hesabına yatırılmayıb.

“Vəkillərimizlə əlaqə saxlayırıq. Onlar bildirirlər ki, Ermənistanın kompensasiyanı vaxtında ödəməməsi və məhkəmənin qərarını icra etməməsi ilə bağlı Avropa Nazirlər Komitəsinə məlumat verilib. Lakin Komitədən cavab verilməyib. Biz də gözləyirik. Ermənistan höküməti kompensasiyanı vaxtında ödəməsə, hər gecikən gün üçün üstünə faiz gəlir. Hələki faizlər yığılır və onlardan cavab yoxdur. Əsas odur ki, biz Ermənistanı udduq, sonrası artıq qəpik-quruşdur”.

Xatırladaq ki, Avropa İnsan Haqları Məhkəməsi 2015-ci il iyunun 16-da “Çıraqov və başqaları Ermənistana” qarşı işi ilə bağlı qərar çıxararaq şikayətçilərə qarşı Avropaİnsan Haqları Konvensiyasının 1-ci Protokolunun 1-ci maddəsi (mülkiyyətin toxunulmazlığı), Konvensiyanın 8-ci (şəxsi həyatın toxunulmazlığı), 13-cü (ədalətli mühakimə hüququ) maddələrinin davamlı pozulduğunu bildirib. İş üzrə iddiaçılar Elxan və Adışirin Çıraqovlar (1950 və 1947-ci il təvəllüdlü), Ramiz Cəbrayılov (1960), Akif Həsənov (1959), Fəxrəddin Paşayev (1956) və artıq vəfat etmiş Qara Cəbrayılovdur (1940). Akif Həsənovdan başqa iddiaçıların hamısı hazırda Bakıda yaşayır. Laçın rayon sakinləri olan bu şəxslər 1992-ci il mayın 17-də zorla evlərindən qovulub, onların mülkiyyəti ermənilərin əlinə keçib.

Aytən Zəhra
AzVision.az

Teqlər: Ermənistan   Çıraqovlar-İşi   Məhkəmə