62 dövlət əmlakı hərraca çıxarılıb

 62 dövlət əmlakı hərraca çıxarılıb
  18 Mart 2019    Oxunub:2587
Aprelin 16-da keçiriləcək özəlləşdirmə hərracında iştirak etmək istəyənlərin ümumilikdə 62 dövlət əmlakı üzrə seçim etmək imkanı var.
Əmlak Məsələləri Dövlət Komitəsindən (ƏMDK) Azvision.az -a verilən məlumata görə, bu dövlət əmlaklarından 19-u səhmdar cəmiyyəti, 18-i kiçik dövlət müəssisə və obyekti, 12-si qeyri-yaşayış sahəsi, 13-ü isə nəqliyyat vasitəsidir. Özəlləşməyə çıxarılan kiçik dövlət müəssisələrindən 4-ü paytaxtda, digərləri isə Quba, Cəlilabad, Yevlax, Siyəzən kimi şəhər və rayonlarda yerləşir. 13-ü ticarət, digərləri ictimai xidmət obyektləri olan dövlət əmlaklarının ümumi faydalı sahəsi 20,1 kvadratmetr ilə 1664,4 kvadratmetr arasındadır. Budəfəki hərracda ən yüksək ümumi faydalı sahəsi olan dövlət əmlakı Bakı şəhəri, Suraxanı rayonu, Yeni Günəşli qəsəbəsindədir. Obyektin özəlləşdirilməsi investora müxtəlif xidmət sahələri üzrə gəlirli fəaliyyət imkanı verə bilər.

Həmçinin hərraca çıxarılan qeyri-yaşayış sahələrindən 9-u paytaxtda, 3-ü isə Daşkəsən, Şirvan və Gəncədə yerləşir. Kiçik büdcə ilə biznesə başlamaq istəyənlər seçimini bu növ dövlət əmlakları üzrə edə bilərlər. Qeyri-yaşayış sahələrinin ümumi faydalı sahəsi 11,9 kvadratmetr ilə 127,4 kvadratmetr arasındadır. Bakı şəhəri, Nizami rayonu, B.Çobanzadə küçəsindəki obyekt ticarət və digər xidmət sahələri üzrə istifadə üçün əlverişlidir. Qeyd edək ki, bu dövlət əmlakının ümumi faydalı sahəsi 35,8 kvadratmetrdir.

Dövlətə məxsus səhm paketlərinin hərraca çıxarıldığı səhmdar cəmiyyətləri kənd təsərrüfatı, nəqliyyat, təmir-tikinti və digər sahələrə aiddir. Ümumi səhmlərinin 30-45 faizlik səhm paketləri özəlləşdirməyə çıxarılan dövlət əmlakları Bərdə, Salyan, Oğuzla yanaşı, digər şəhər və rayonlarda yerləşir.

Buraxılış tarixi 1998-2011 olan nəqliyyat vasitələri “Nissan”, “BMW”, “Hyundai” və digər markalara aiddir. Avtomobillər üçün təyin olunan ilkin hərrac qiyməti isə 3 min və 10 min manat arasındadır. Elektron prosedurlardan istifadə edərək hərraca qoşulmaq istəyənlər komitənin rəsmi informasiya resurslarına müraciət edə bilər. Hər kəs sayt (emdk.gov.az) və özəlləşdirmə portalı (privatization.az) vasitəsilə hərraca çıxarılan dövlət əmlakları barədə ətraflı məlumat əldə edib, onlayn formada seçdiyi əmlakın sifarişçisinə çevrilə bilər.

Azvision.az


Teqlər: ƏMDK  





Xəbər lenti