Zaqatala çayı Parisdə tanıdılacaq

  25 Sentyabr 2019    Oxunub : 976
Zaqatala çayı Parisdə tanıdılacaq
Kənd Təsərrüfatı Nazirliyinin tabeliyində olan “Aqrar Tədarük və Təchizat” Açıq Səhmdar Cəmiyyəti sentyabrın 27-29-da Fransanın paytaxtında təşkil olunacaq “Parisdə beynəlxalq çay kəndi” (“Village des thés”) tədbirində iştirak edəcək. ASC-nin tədbirdə iştirakı Azərbaycanın Fransadakı səfirliyi, Fransada Azərbaycanın Dostları Assosiasiyası, eləcə də Paris Azərbaycan Evi təşkilatının dəstəyi ilə baş tutacaq.
Kənd Təsərrüfatı Nazirliyinin İctimaiyyətlə əlaqələr və informasiya təminatı şöbəsindən Azvision.az -a verilən məlumata görə, beynəlxalq festivalda iştirakın əsas məqsədi Azərbaycan çay mədəniyyətinin, yerli istehsal olan qida məhsullarının, o cümlədən “Kənddən Şəhərə” brendi altında qablaşdırılan Zaqatala çayının ölkədən kənarda tanıdılması və yeni beynəlxalq əlaqələrin yaradılmasıdır. Parisdə Saint Sulpice meydanında keçiriləcək beynəlxalq festivalda Zaqatala çayı ilə bərabər digər yerli çay növləri, həmçinin çaya əlavə edilən yerli ədviyyatlar, müxtəlif şirniyyatlar və quru meyvələr sərgilənəcək. Festivalda Zaqatala çayının və digər ədviyyatlı çayların, qida məhsullarının dequstasiyası da təşkil olunacaq.

Festival çərçivəsində ATT nümayəndə heyəti ixrac potensialı böyük olan yerli istehsal məhsulların ixracına dəstək məqsədi ilə müxtəlif görüşlər keçirəcək. ATT nümayəndə heyətinin tərkibində “Zaqatala çayı” istehsalçısının nümayəndəsi də görüşlərdə iştirak edəcək. Bu da qurumun kiçik və orta fermer təsərrüfatı sahiblərinin və yerli qida istehsalçılarının dostu olduğunun bariz nümunəsidir. Belə ki, “Aqrar Tədarük və Təchizat” ASC əsas vəzifələri ilə bərabər, həmçinin nizamnaməsindən irəli gələrək yerli qida istehsalçılarını məhsullarını ixrac etməyə təşviq edir və onların xarici bazarlara çıxmasına yardımçı olur. Bu günə qədər ATT-nin dəstəyi ilə yerli fermerlər Birləşmiş Ərəb Əmirliyi, Gürcüstan, Ukrayna, Rusiya, Nigeriya kimi ölkələrə məhsul ixrac ediblər.

Qeyd edək ki, “Parisdə beynəlxalq çay kəndi” tədbirinin açılış mərasimi sentyabrın 27-də Parisin 6-cı rayonunun icra hakimi Jan Piyer Lökokun və bir çox siyasi-ictimai xadimin iştirakı ilə keçiriləcək.

Azvision.az

Teqlər: Zaqatala   Paris   Çay