Belarus paytaxtında MDB-nin Daimi Nümayəndələr Şurasının 2014-cü ildə ilk iclası olacaq

Yanvarın 21-də MDB İcraiyyə Komitəsində Birlik iştirakçısı olan dövlətlərin bu təşkilatın Nizamnamə və digər orqanları yanında Səlahiyyətli Daimi Nümayəndələri Şurasının 2014-cü ildə ilk iclası keçiriləcək.

AzVision.az AzərTAc - a istinadən xəbər verir ki, bu barədə Birliyin Minskdəki mənzil-qərargahının mətbuat xidmətində məlumat verilib

MDB İcraiyyə Komitəsinin sədri – icraçı katib Sergey Lebedev iclasda iştirak edəcək.

Cari ildə Ukraynanın MDB-də sədr olması ilə əlaqədar, Daimi Nümayəndələr Şurasına Birliyin əlaqələndirmə təsisatları yanında Ukraynanın səlahiyyətli daimi nümayəndəsi İvan Buneçko başçılıq edəcək.

İ.Buneçko 2014-cü ildə Ukraynanın MDB-də sədrlik Konsepsiyasını və həmin konsepsiyanın həyata keçirilməsinə dair Tədbirlər Planını həmkarlarına təqdim edəcək. Konsepsiyanın preambulasında qeyd edilir ki, Ukraynanın Birlikdə sədrliyi MDB-nin bundan sonra da fasiləsiz inkişafının təmin edilməsinə və Birliyin iştirakçısı olan hər bir dövlətin milli maraqlarına uyğun, qarşılıqlı faydalı əməkdaşlığın möhkəmlənməsinə yönəldiləcək.

Sənəddə xarici siyasət, iqtisadiyyat, nəqliyyat, energetika, elmi-texniki, humanitar sahələrdə və innovasiya sahələrində, habelə yeni təhdidlərə və təhlükələrə qarşı mübarizə sahəsində prioritet vəzifələr ifadə edilib.

Şurada Birlik iştirakçısı olan dövlətlərin bu təşkilatın Nizamnamə və digər orqanları yanında Səlahiyyətli Daimi Nümayəndələri Şurasının və MDB İcraiyyə Komitəsinin Ukraynanın sədrliyi çərçivəsində bütün tədbirlərin yerinə yetirilməsinə köməyi məsələləri müzakirə ediləcəkdir.

Bundan əlavə, Daimi Nümayəndələr Şurasının üzvləri 2014-cü il üçün Şuranın iş planını təsdiq edəcək, MDB Xarici İşlər Nazirləri Şurasının bu il aprelin 4-də Moskvada keçirilməsi nəzərdə tutulan növbəti iclasının gündəliyinin layihəsinə dair təklifləri nəzərdən keçirəcəklər.