Bəzi attraksionlar uşaqlar üçün pulsuz fəaliyyətə başlayıb. Attraksionlar səhər saat 9:00-dan 12:00-a qədər 15 yaşına qədər olan uşaqlara pulsuz xidmət göstərib.

Şəhərdə baş verənləri müşahidə etmək üçün həmin əraziyə yollandıq. Havanın qızmar günəşli olmağına baxmayaraq dediyimiz kimi elə səhər saatlarından valideynlər azyaşlılarını əylənməyə gətirmişdilər. İnsanlar istiyə məhəl vermədən əylənmək üstündə hətta 1 saata yaxın belə gözləməli olurdular.

ANS PRESS-ə danışan valideyn uşaqların bu gün çox sevincli olduqlarını bildirib:

"Bu gün uşaqlar bayramıdır, attraksionların pulsuz olması yerinə düşdü. Uşaqlarımızı gətirmişik, ürəkləri istədiyi qədər əylənirlər, amma bir problem var ki, çox sıxlıqdır, valideynlər arasında narazıçılıq yaranır. Bunun vaxtını bir az da uzatsalar, yaxşı olardı. İstidə, günün altında gözləmək uşaqlar üçün də çətindir".

Qeyd edək ki, pulsuz attraksionlara görə valideynlər arasında növbə tutmaq üçün söz davası düşdü.

Pulsuz attraksionların keçirilməsində əsas məqsəd isə maddi vəziyyəti aşağı olan valideynləri sevindirməkdir. Amma təəssüflər olsun ki, bu addımı tez-tez atmaq da mümkün olmur. Buna səbəb kimi həftə sonu və bayram günləri Milli Parkda əhalinin sıx olması göstərilir. Belə olan halda valideynlər və uşaqlar arasında anlaşılmazlıq yaranır. Ona görə də pulsuz attraksionların tez-tez keçirilməsi mümkün olmur.

Qeyd edək ki, məktəblilərin son zəng bayramları ilə əlaqədar olaraq Milli Park bu gündən etibarən gücləndirilmiş iş rejiminə keçib.