AzVision.az xəbər verir ki, qonaqların İçərişəhərdə gəzintisi Qız qalası ilə tanışlıqdan başlanıb. Onlara bu abidənin qeyri-adi memarlıq xüsusiyyətləri barədə ətraflı məlumat verilib.

Qonaqlara elektromobillərdə gəzinti zamanı UNESCO-nun Dünya İrsi Siyahısına daxil edilmiş “İçərişəhər” Dövlət Tarix-Memarlıq Qoruğu, burada aparılan təmir-bərpa və abadlıq işləri barədə məlumat verilib. Qeyd edilib ki, İçərişəhər ərazisində yerləşən, müxtəlif əsrlərə aid nadir tarix-memarlıq abidələri dövlət tərəfindən qorunur.

Kiçik Qala küçəsində gəzinti zamanı qonaqlar təndir çörəyinə qonaq ediliblər.

Sonra rusiyalı qonaqlar Şərqin memarlıq incilərindən sayılan dünya əhəmiyyətli Şirvanşahlar Saray Kompleksi tarix-memarlıq abidəsi ilə də tanış olublar.

Qonaqlar Şirvanşahlar Saray Kompleksində İçərişəhərin müasir görüntüsünü əks etdirən maketlə də tanış olublar.

Nümayəndə heyətinə İçərişəhərdəki dünya əhəmiyyətli memarlıq abidəsi olan Məhəmməd məscidi haqqında məlumat verilib.

Ölkə əhəmiyyətli abidə olan ikimərtəbəli Karvansara ilə tanışlıqdan sonra Rusiyanın iqtisadi inkişaf naziri Aleksey Ulyukayev “İçərişəhər” Dövlət Tarix-Memarlıq Qoruğunun fəxri qonaqlar kitabına ürək sözlərini yazıb.

Azərbaycan paytaxtının qədim guşəsi ilə tanışlıqdan xatirə olaraq qonağa hədiyyə təqdim edilib.

Qədim İçərişəhərlə tanışlıq qonaqlarda xoş təəssüratlar oyadıb.