Bu gün saat 19:00-da Ermənistanın Gənclər Teatrında 1983 - cü ildə baş vermiş Lissabon terroruna həsr olunmuş geniş tədbir keçiriləcək.

"Jam" saytı yazır ki, tədbir geniş formatda təşkil olunacaq: "40 il əvvəl, 1983-cü il iyulun 27-də 5 erməni terrorçusu Lissabondakı Türkiyə səfirliyinə daxil olaraq, bu ölkənin müvəqqəti işlər vəkilinin xanımı Cahidə Mıhıçoğlunu və onun 17 yaşlı oğlu Atasayı girov götürmüşdülər. Onlar diplomatın xanımını və bir yerli polisi qətlə yetirərək, özləri ilə bərabər binanı partlatdılar".

Qətlə yetirilən 14 yaşlı qız, hava limanına bombalı hücüm - ASALA cinayətləri

Nəşr "Lissabon 5" adlanan terrorçuların anım tədbirində tematik çıxışların, tədbirə həsr olunmuş qısametrajlı filmin nümayişinin planlaşdırıldığını yazıb.

"Tədbirdə aktyor Arman Navasardyan, musiqiçi Andranik Sarkavaq Manukyan, müğənnilər Samvel Yeranyanla Nersik İspiryan iştirak edəcək", - müəllif yazıb.

Erməni xalqının Njdedən tutmuş Monte Melkonyana qədər olan terrorçu və nasistləri uydurma qəhrəman kimi təqdim etməsi haradasa başa düşüləndir. Çünki bu toplumun nümunəvi qəhrəmanlıq tarixi, şəxsiyyətləri yoxdur.

Tural Tağıyev
AzVision.az