Rusiya XİN: "Bakı və İrəvan istənilən şərtlə

Rusiya XİN: "Bakı və İrəvan istənilən şərtlə sülhə hazır deyil"

11:06 04 Avqust 2023 Oxunub:1069

"Azərbaycan və Ermənistan istənilən şərtlə sülh müqaviləsi bağlamağa hazır deyil. Hələ həllini gözləyən çətin məsələlər var".

AzVision.az xəbər verir ki, bunu TASS-a müsahibəsində Rusiya Xarici İşlər Nazirliyinin MDB ölkələri üzrə dördüncü departamentinin direktoru Denis Qonçar deyib.

Rusiya: "Tələsik hazırlanmış Bakı-İrəvan sülhü yeni münaqişələr yaradacaq"

"Bakı və İrəvandan mümkün qədər tez sülhə nail olmaq öhdəliyi ilə bağlı gələn siqnallar o demək deyil ki, tərəflər istənilən şərtlərlə razılaşmağa hazırdır. Biz hələ də bir sıra çətin mövzular üzrə həll yollarını tapmalıyıq", - o, sülhün bərqərar olmasına hansı problemlərin mane olduğu haqqında suala cavab verərkən qeyd edib.

Diplomat onu da vurğulayıb ki, məlum çətinliklərdən ən mühümü Azərbaycanın hüquq sahəsi çərçivəsində Qarabağ ermənilərinin təhlükəsizliyinin təmin edilməsi və onların hər kəs tərəfindən tanınan hüquqlarına riayət olunması problemidir.

"Tərəflər müvafiq məntiqi 1991-ci il Alma-Ata Bəyannaməsinin effektivliyinin qarşılıqlı təsdiqindən sonra müəyyən ediblər. Sazişin həyata keçirilməsinə beynəlxalq dəstək mexanizmi də tələb olunur ki, bu da Ermənistan və Azərbaycanın siyasi müstəqilliyini və suverenliyini şübhə altına almayacaq. ”, - Qonçar əlavə edib.

O vurğulayıb ki, Rusiya sülh müqaviləsinin hazırlanmasında tərəflərə fəal kömək edir.

"Ermənistan-Azərbaycan sülh müqaviləsinin hazırlanması Rusiya ilə Azərbaycan prezidentləri və Ermənistanın baş naziri arasında üçtərəfli sazişlərin elementlərindən biridir. Rusiya tərəfi bütün səviyyələrdə siyasi-diplomatik kanallardan istifadə edərək, bu sənədin hazırlanmasında Bakı və İrəvana fəal kömək edir. Üçtərəfli sammitlər hər il keçirilir, xarici işlər nazirləri müntəzəm olaraq görüşürlər”, - Rusiya XİN rəsmisi qeyd edib.

Tural Tağıyev
AzVision.az

Teqlər: Rusiya Sülh Qarabağ