AzVision.az xəbər verir ki, Boris Consonun “Daily Mail” nəşrindəki yazısında əsas diqqət Ukraynadakı müharibəyə yönəldilib. Ukraynalılar qalib gələ biləcəklərini, gəlməli olduqlarını və qələbə qazanacaqlarını bildirən Conson, bunun onların Qərbdəki dostlarından səbr və qətiyyət tələb edəcəyini vurğulayıb.

“Bəli, buna görə də, oxuduğum məğlubiyyət cəfəngiyyatı və respublikaçılar partiyasının bəzi üzvlərinin sanki bir suveren dövləti qınaması, demokratik Avropa ölkəsini qaranlığa və tiranlığa düçar etmək istəməsi məni narahat edir. Əvvəlcə özünüzdən soruşun: 2014-cü ildə Putinin işğalından sonra Ukraynanı ilk müdafiə edən hansı Amerika prezidenti olub? Böyük liberal-beynəlmiləlçi Barak Obama? Xeyr, ser. O, Putini Ukraynadan qovmaq üçün heç nə etməyib – nə Krımdan, nə də Donbassdan. Nə fransızlar, nə də almanlar bunu etmədilər, düzünü desəm, əllərini müəmmalı şəkildə yumağa və ukraynalıların taleyini mənəvi cəhətdən iflasa uğramış “Normandiya format”na həvalə etməyə qərar verən o vaxtkı Britaniya hökuməti də”, - sabiq baş nazir yazıb.

Boris Conson Kiyev uğrunda döyüşdə ukraynalılar üçün çox dəyərli olan tank əleyhinə “Javelin” raket kompleksini onlara məhz Trampın verdiyini xatırladıb. Ən azı qismən Trampın cəsarətli qərarı sayəsində ukraynalılar dünyanı heyrətə gətirə və Putinin qoşunlarını Ukrayna paytaxtından qaçmağa məcbur edə bildilər.

Conson Trampın ukraynalıları tərk edəcəyinə, sadəcə, “inana bilmədiyini” söyləyib. Əksinə, sabiq baş nazir düşünür ki, Tramp, şübhəsiz, Rusiya prezidenti ilə razılığa gələ bilməyəcəyini başa düşəcək və Ukraynaya qələbə üçün lazım olan hər şeyi verərək səylərini ikiqat artıracaq. Onun iddiasına görə, əgər son 4 ildə Tramp prezident olsa idi Putin Ukraynaya hücuma cəsarət etməzdi.

“Məhz Tramp 2020-ci ilin əvvəlində SEPAH-ın başçısı Qasım Süleymanini qəddarcasına öldürməklə dünyanı qəfil heyrətə saldı. Trampın prezidentliyinin sonuna qədər İrandan az bəyanatlar eşitdik, elə deyilmi? Yaxud Suriyanı götürək, Bəşər Əsəd 2013-cü ildə öz xalqını qanunsuz kimyəvi silahlarla zəhərlədi.

Bəs Barak Obamanın dövründə Amerika nə etdi? Heç nə. Tramp ona elə güclü zərbə vurdu və o qədər çox təyyarəni məhv etdi ki, Əsəd bir daha kimyəvi silahdan istifadə etmədi. Ona görə də Trampın əleyhinə olan bütün böyük ağıla məxsus dostlarıma deyirəm: sakitləşin, dostlar. Nə qədər çox köpüklənsəniz və narahatlıq keçirsəniz, onun tərəfdarları bir o qədər qətiyyətli olacaq və Trampın qələbəsi ehtimaldan yəqinliyə doğru artmağa davam edəcək”, - Böyük Britaniyanın keçmiş baş naziri vurğulayıb.

Bu baxımdan, o, hamını kamilləşməyə və bu perspektivlə barışmağa çağırıb. Çünki Tramp düzgün hərəkət etsə və ukraynalıları dəstəkləsə, onun prezidentliyi dünya üçün böyük qələbə ola bilər. Boris Conson Trampın məhz belə edəcəyinə inandığını bildirib.
Sahil İsgəndərov
AzVision.az