Girovluqda olan Şahbaz Quliyevin yeni videosu ailəsinə göstərildi

  Girovluqda olan Şahbaz Quliyevin yeni videosu ailəsinə göstərildi
  22 Yanvar 2020    Oxunub:9720
Beynəlxalq Qırmızı Xaç Komitəsinin (BQXK) nümayəndələri kəlbəcərli girov Şahbaz Quliyevin ailəsinə onun yeni videogörüntülərini təqdim edib.

Bu barədə Azvision.az -a girovun qardaşı Manaf Quliyev məlumat verib. Onun sözlərinə görə, Şahbaz Quliyevin səhhətinin normal olduğu deyilir.
“Ötən həftə Beynəlxalq Qırmızı Xaç Komitəsinin (BQXK) nümayəndələri qardaşımın videosu gətirdilər. Təxminən 3 dəqiqəlik videoda Şahbaz səhhətinin normal olduğunu, heç bir narahatçılığının olmadığını bildirdi. Bayramqabağı ona şirniyyat və geyim göndərmişdik. Buna görə də ayrıca təşəkkür etdi. Bildirdi ki, göndərdiklərimiz ona çatıb. Şahbaz əvvəlki görüntülərinə nisbətən yaxşı görünürdü. Bir istəyi olmadı. Çünki onu artıq söz danışmağa qoymurlar”, - deyə girovun qardaşı bildirib.

Xatırladaq ki, 2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

İşğal altındakı Dağlıq Qarabağda D. Əsgərov və Ş. Quliyev üzərində qanunsuz “məhkəmə” qurulub. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilib.

Şahanə Rəhimli
Azvision.az


Teqlər: Şahbaz-Quliyev   Girov   Kəlbəcər  





Xəbər lenti