Azvision.az xəbər verir ki, bunu Prezidentin köməkçisi, Prezident Administrasiyasının xarici siyasət məsələləri şöbəsinin müdiri Hikmət Hacıyev Nazirlər Kabineti yanında Operativ Qərargahın brifinqində deyib.

Onun sözlərinə görə, müxtəlif kanallar vasitəsilə daxil olan məlumat ondan ibarətdir ki, Ermənistanın özündə yayılma tendesiyası ilə bərabər Azərbaycanın işğal olunmuş ərazilərində də kütləvi şəkildə virusun yayılması vardır.

"Dağlıq Qarabağın erməni icması Azərbaycan vətəndaşlarıdır. Həmin vətəndaşların yoluxması da Azərbaycanın ümumi statistikasında göstərilməlidir. Ancaq işğal faktı bu məlumatları əldə etməyə imkan vermir. ÜST-ə müraciətimizdə də bildirilib ki, Dağlıq Qarabağda yoluxmalar barədə məlumatlar daxil olanda, bu, Azərbaycanın ümumi statistikasında göstərilməlidir”.

H.Hacıyev qeyd edib ki, Şuşada qondarma rejim maskasız, sosial məsafə gözləmədən qondarma anım mərasimi keçirib: “ İşğal olunmuş ərazilərdə Ermənistan silahlı bölmələrinin hərəkəti də yoluxma hallarının artmasına səbəb olur. Bu ərazilərimizdə koronavirusa yoluxma halı çoxdur, lakin Ermənistan gizlədir”.

Aytən Zəhra

Azvision.az