“Xədicə ana nənəsinin himayəsindədir” - Komitədən açıqlama

  06 Noyabr 2020    Oxunub : 1849
 “Xədicə ana nənəsinin himayəsindədir” -  Komitədən açıqlama
Ermənistan silahlı qüvvələri tərəfindən Gəncə şəhərinin ballistik raketlə vurulması nəticəsində valideynlərini və bacısını itirən Şahnəzərli Xədicə Röyal qızı ilə bağlı kütləvi informasiya vasitələrində və internet resurslarında məlumatlar yayılmışdır. Bu görüntülər haqlı olaraq cəmiyyətdə narahatlığa səbəb olub.
Azvision.az xəbər verir ki, bu barədə Ailə, Qadın və Uşaq problemləri üzrə Dövlət Komitəsi məlumat yayıb. Bildirilib ki, 03.11.2020-ci il tarixində Ailə, Qadın və Uşaq Problemləri üzrə Dövlət Komitəsinin nümayəndələri vəziyyəti araşdırmaq məqsədilə ailəyə səfər ediblər.

3 yaşlı Ş.Xədicə Samux rayonu Seyyidlər kəndində ana nənəsinin himayəsindədir, yaşadığı ev uyğun şəraitlidir və psixoloji vəziyyəti normal olaraq qiymətləndirilir.

Hazırda kütləvi informasiya vasitələrində yayılmış məlumatı nəzərə alaraq bildiririk ki, azyaşlı Komitə tərəfindən nəzarətə götürülüb, qiymətləndirilmə aparılaraq qanunvericilikdə nəzərdə tutulmuş qaydada uşağın ən yaxşı maraqlarına uyğun tədbirlər görüləcək.

Qeyd edək ki, həyata keçirilən tədbirlərlə bağlı ictimaiyyətə ətraflı məlumatlar təqdim ediləcək.

Azvision.az

Teqlər: Gəncə   Terror   Xədicə