Bu fikri Ermənistanın keçmiş baş naziri Xosrov Arutyunyan Sputnik Ermənistan-a müsahibəsində deyib. O, İrəvanın nizamnaməni ratifikasiya etməsinin Ermənistan-Rusiya müttəfiqlik münasibətlərinə mümkün təsirini şərh edərkən qeyd edib ki, ölkəsinin Roma Statutuna qoşulmasının əsas səbəbi rəsmi Bakıya qarşı təxribatçı gedişdir. Yəni, İrəvan rəhbərliyi beynəlxalq instansiyalarda hərbi cinayətlərə görə Azərbaycana qarşı cinayət işinin başlanmasına ümid edib.

Beynəlxalq Cinayət Məhkəməsi Rusiya prezidentinin həbsinə qərar verdikdən sonra isə ratifikasiya prosesi problemli məsələyə çevrilib.

Rusiya Federal Məclisindən İrəvana xəbərdarlıq

"Belə bir şəraitdə Roma Statunun ratifikasiyası açıq şəkildə Rusiya ilə münasibətləri gərginləşdirmək deməkdir. Məncə, Rusiyada heç kim Vladimir Putinin Ermənistana gələcəyi təqdirdə həbsə atılacağına inanmır. Amma mənimlə razılaşarsız ki, Beynəlxalq Cinayət Məhkəməsinin Putini həbs etmək qərarına gəlməsi faktı və bu qərarın fonunda Rusiyanın strateji tərəfdaşının məlum statuta qoşulması problemli məsələdir. Mən gözəl bilirəm ki, İrəvan niyə məhz indi buna getdi”, - keçmiş baş nazir vurğulayıb.

O, qeyd edib ki, bu addım Ermənistan-Rusiya münasibətlərinin onsuz da etibarlı olmayan atmosferini daha da sarsıda bilər. Hazırda Roma Statutuna qoşulmaq Ermənistana heç nə verməyəcək. Əksinə, bu, İrəvana problemlər yaradacaq. Buna görə də Arutyunyan Ermənistan hakimiyyətinə vəziyyətin daha da “bulandırılması” yolu ilə getməməyi tövsiyə edir.

Xatırladaq ki, bir neçə gün öncə Rusiya Federasiyası Federal Məclisi ilə Ermənistan parlamenti arasında əməkdaşlıq üzrə parlamentlərarası komissiyanın iclası keçirilərkən bu mövzuya toxunulmuşdu. Federasiya Şurasının sədr müavini, komissiyanın həmsədri Yuri Vorobyov bildirmişdi ki, Ermənistan parlamenti ölkənin Roma Statuna qoşulmasının nəticələrini araşdırmalı və Rusiya ilə müttəfiqliyə dair yarana biləcək bütün riskləri qiymətləndirməlidir.

Tural Tağıyev
AzVision.az