General Elçin Quliyevə 10 il həbs verildi - Əmlakı müsadirə olunacaq

  30 Noyabr 2017    Oxunub : 1660
General Elçin Quliyevə 10 il həbs verildi - Əmlakı müsadirə olunacaq

Bu gün Bakı Hərbi Məhkəməsində ləğv edilmiş Milli Təhlükəsizlik Nazirliyinin (MTN) Antiterror Mərkəzinin sabiq rəisi, general-mayor Elçin Quliyev və həmin mərkəzin əməkdaşı, polkovnik Azər Mehdiyevin cinayət işi üzrə məhkəmə iclası başa çatıb.

AzVision.az Report-a istinadən xəbər verir ki, sabiq MTN generalı Elçin Quliyev və keçmiş MTN polkovniki Azər Mehdiyev Bakı Hərbi Məhkəməsinə xüsusi nəzarət altında gətirilib. Məhkəmə binası xüsusi nəzarətə götürülüb, proses başlamazdan əvvəl məhkəmə zalı ciddi şəkildə yoxlanılıb. Hakim Elbəy Allahverdiyevin sədrliyi ilə keçirilən prosesdə hökm oxunub.

Məhkəmənin hökmü ilə E.Quliyev 10 il 6 ay və A.Mehdiyev 8 il müddətinə azadlıqdan məhrum edilib. Hökmə əsasən, onların hərbi rütbədən məhrum olunması üçün ölkə başçısına təqdimat göndərilməsi ilə bağlı qərar da qəbul edilib.

Bundan başqa Dövlət Təhlükəsizlik Xidmətinin (DTX) təqsirləndirilən E.Quliyevə qarşı qaldırdığı 7 milyon manatlıq mülk iddiası təmin edilib. Təqsirləndirilən şəxslərin əmlaklarının dövlətin xeyirinə müsadirə edilməsi barədə də qərar qəbul olunub.

AzVision.az

Teqlər: Məhkəmə   MTN