Bunu AzVision.az-a kəlbəcərli girov Şahbaz Quliyevin qardaşı İlham Quliyev deyib. Onun sözlərinə görə, BQXK nümayəndələri bu ayın əvvəlində Kəlbəcər girovları ilə görüş keçirsə də, Şahbazın ailəsinə bu barədə məlumat verilməyib.

“Aylardır komitənin zəngini gözləyirik ki, qardaşımızın heç olmasa sağ olması haqqında məlumat alaq. Ancaq bir xəbər yoxdur. İki ay bundan öncə biz məktub yazmışdıq. Ona da cavab gəlməyib. Şahbazın səhhəti bizi çox narahat edir. Şəkili, videosu da yoxdur ki, baxıb təsəlli tapaq. Ümidimiz ancaq gözləməkdir”.

Xatırladaq ki, 2014-cü ilin iyul ayında Rusiya vətəndaşı Dilqəm Əsgərov və Azərbaycan vətəndaşı Şahbaz Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüblər, Azərbaycan vətəndaşı Həsən Həsənov isə güllələnərək öldürülüb. H. Həsənovun meyiti düşməndən alınaraq Bakıda dəfn edilib.

İşğal altındakı Dağlıq Qarabağda D. Əsgərov və Ş. Quliyev üzərində qanunsuz “məhkəmə” qurulub. “Məhkəmə”nin qərarı ilə D. Əsgərov ömürlük, Ş. Quliyev isə 22 il müddətinə azadlıqdan məhrum edilib.

Şahanə Rəhimli
AzVision.az