Daşınmaz əmlaka dair 262 minədək çıxarış verilib

Daşınmaz əmlaka dair 262 minədək çıxarış verilib
  15 Yanvar 2020    Oxunub:3309
2019-cu ildə ölkə üzrə daşınmaz əmlaka dair 262 minədək çıxarış verilib. Bu, 2018-ci illə müqayisədə 16,5 faiz çoxdur.
Əmlak Məsələləri Dövlət Komitəsindən Azvision.az -a bildirilib ki, qeydiyyata alınan əmlakın 77 mindən çoxu (29,5 faiz) ilkin, 185 minə yaxını (70,5 faiz) isə təkrar qeydiyyata aiddir. Bunlardan 44 minədək fərdi yaşayış və bağ evi, 75,5 minədək mənzil, 13 minədək torpaq sahəsi, 4,5 minədək qeyri-yaşayış binası, 1000-dək əmlak kompleksi, 7049-u qeyri-yaşayış sahəsi, 75-i çoxmərtəbəli yaşayış binası, 24-ü isə çoxillik əkmələrdir.

Keçən il 224 minədək daşınmaz əmlakın texniki pasportu tərtib edilib. Eyni zamanda, 43,5 mindən çox ipoteka müqaviləsi, 4309 yüklülük (icarə, istifadə) dövlət qeydiyyatına alınıb, hüquqi və fiziki şəxslərə dövlət reyestrindən 250 minədək məhdudiyyət arayışı verilib. Daşınmaz Əmlakın Dövlət Reyestri Xidmətinə istismara icazə aktı daxil olan 280-dək bina üzrə 11 min mənzilin çıxarışı hazırlanıb.

Qeyd edək ki, vətəndaşların daha rahat şəkildə mülkiyyət hüquqlarını rəsmiləşdirməsi üçün səyyar qeydiyyat kampaniyaları keçirilir və birbaşa ünvanlarda qeydiyyat xidmətləri göstərilir. Ötən il ərzində 22 bölgədə səyyar qeydiyyat kampaniyası təşkil edilib.

Daşınmaz əmlakın qeydiyyatı sahəsində göstərilən xidmətlərdən vətəndaşların rahatlıqla, daha az vaxt sərf etməklə istifadəsi, əhalinin əmlakının azsaylı prosedurlarla qeydiyyata alınması əsas məqsədlərdəndir. Belə ki, xidmətlərin keyfiyyətinin artırılması, prosedurların sadələşdirilməsi, müasir yanaşmaların tətbiqi vətəndaş məmnunluğunun yüksəlməsində, ipoteka, girov, sığorta kimi iqtisadi əməliyyatların yerinə yetirilməsində xüsusi önəm kəsb edir.

Ötən il daşınmaz əmlakın qeydiyyatında vətəndaş məmnunluğuna xidmət edən bir sıra yeniliklər tətbiq edilib. Prezident İlham Əliyevin müvafiq Fərmanına uyğun olaraq, çıxarışların elektron müstəviyə keçidi təmin olunub. Bu da qeydiyyat prosedurunun sadələşməsinə, operativliyin və şəffaflığın artmasına əlavə imkanlar yaradır. Elektron çıxarışların tətbiqi ilə ölkədə təkrar qeydiyyat tam olaraq elektron müstəvidə aparılır. Bu sahədə prosedurların sadələşməsi, optimallığın artırılması nəticəsində çıxarışları qısa müddətdə, hətta 1 iş günü ərazində də əldə etmək mümkündür. Əhaliyə göstərilən xidmətlərin modernləşdirilməsi, daha çevik şəkildə həyata keçirilməsi vətəndaşlarda əmlakın qeydiyyata alınması ilə bağlı maraq yaradıb.

Azvision.az


Teqlər: Əmlak   Komitə  





Xəbər lenti