Xəbər verdiyimiz kimi, prezident İlham Əliyevin sərəncamı ilə Fövqəladə Hallar Nazirliyinə 2 yeni təyinat həyata keçirilib. Ölkə başçısının sərəncamına əsasən, Teymur Mehdiyev və Tapdıq Əmiraslanov Kəmaləddin Heydərovun müavinləri təyin ediliblər. Yeni nazir müavinləri haqda mətbuatda az məlumatlara rast gəlinsə də onların valideynləri ölkə miqyasında kifayət qədər nüfuzlu şəxslərdir və yüksək postlar tuturlar.

Qeyd etdiyimiz kimi Teymur Mehdiyev Azərbaycan Respublikası Prezidenti Administrasiyasının rəhbəri Ramiz Mehdiyevin, Tapdıq Əmiraslanov isə millət vəkili, Azərbaycan Tibb Universitetinin rektoru Əhliman Əmiraslanovun oğludur.

Yeni nazir müavinlərinin tərcümeyi-halı ilə tanış olaq:

Mehdiyev Teymur Ramiz oğlu 25 iyun 1975-ci il tarixində Gürcüstanın Abxaz MR Suxumi şəhərində anadan olub. O, 1982-ci ildən 1992-ci ilə qədər Bakı şəhərində 134 № li orta məktəbdə təhsil alıb. 1992-ci ildə Bakı Dövlət Universitetinin hüquq fakültəsinə daxil olub və 1997-ci ildə həmin Universiteti bitirib.



T.Mehdiyev 1997-1999-cu illərdə Azərbaycan Respublikası Milli Təhlükəsizlik Nazirliyində çalışıb. O, daha sonra 1999-2001-ci illərdə Azərbaycan Respublikası Daxili İşlər Nazirliyində işləyib. 2001-2004-cü illərdə Azərbaycan Respublikası Xarici İşlər Nazirliyində çalışıb.

2004-2006-cı illərdə Azərbaycan Respublikası Gənclər, İdman və Turizm Nazirinin müavini, 2006-2011-ci illərdə isə Azərbaycan Respublikası Mədəniyyət və Turizm Nazirinin müavini, 2011-2014-cü illərdə isə Azərbaycan Respublikası Dövlət Miqrasiya Xidməti rəisinin birinci müavini vəzifələrində çalışıb.

T.Mehdiyevə 2011-ci ildə III dərəcəli dövlət miqrasiya xidməti müşaviri ali xüsusi rütbəsi verilib.

O, Prezidentin 5 may 2014-cü il tarixli Sərəncamı ilə Fövqəladə Hallar nazirinin müavini təyin edilib və general-mayor ali hərbi rütbəsi verilib.

Tapdıq Əmiraslanov 1978-ci il fevralın 7-də Moskva şəhərində anadan olub.

O, 1999-cu ildə ABŞ-ın Hyuston Universitetinin Biznes idarəçiliyi fakültəsini bitirib. Daha sonra 2003-cü ildə Amerikanın St.Tomas Universitetində Biznes idarəçiliyi üzrə təhsil alıb. İxtisası marketinq-maliyyədir. İqtisadi elmlər namizədidir.

O, 2003-ci ilin avqust ayından 2004-cü ilin aprelinədək Maliyyə Nazirliyinin Xarici iqtisadi əlaqələr baş idarəsində Baş məsləhətçi, daha sonra həmin idarədə Xarici dövlət borcunun uçotu və icmallaşdırılması sektorunda sektor müdiri və müdir müavini işləyib.

T.Əmiraslanov 2007-2009-cu illərdə İqtisadi İnkişaf Nazirliyinin Dövlət investisiyaları şöbəsinin, daha sonra Regional inkişaf siyasəti və regionlarla iş şöbəsinin müdiri postuna çalışıb.

O, 2009-cü ilin fevral ayından 2013-cü ilin noyabr ayınadək Fövqəladə Hallar Nazirliyinin Katibliyində Katibliyin köməkçisi, 2013-cü ildən nazir müavini təyin olunanadək həmin katiblikdə rəis müavini vəzifəsində çalışıb.

Ailəlidir, 2 övladı var.

Anar RÜSTƏMOV