AzVision.az xəbər verir ki, bu fikirləri hakim Yeni Azərbaycan Partiyasının (YAP) Siyasi Şurasının üzvü, deputat Aydın Mirzəzadə bildirib.

Adıçəkilən təşkilatın Azərbaycanla bağlı hesabatını tənqid edən YAP rəsmisi qeyd edib ki, istənilən dövlətlərin müstəqilliyinə və onun demokratiya inkişafına hörmətlə yanaşılmalıdır. Ancaq bu adıçəkilən xarici təşkilatın münasibətində yoxdur. Bu təşkilat artıq illərdir ki, Azərbaycana qarşı şər və böhtan kampaniyası aparır. Onlar Azərbaycandakı vəziyyəti daima qara rənglərlə təsvir edirlər.

“Nədənsə sözügedən təşkilat Lela Yunusun şahid kimi dindirilməsinin, adı jurnalist olsa da, konkret cinayət əməlinə görə istintaq altında olan Rauf Mirqədirovun işlərinin mahiyyətinə varmır. Hətta “Human Rights Watch” regional təşkilat olan Avropa Şurasına belə göstərişlər verməyə başlayır.

Bununla belə, həmin təşkilat Azərbaycanda gün ərzində onlarla müxalifət yönümlü qəzetlərin çıxdığını, müxalif fikirli insanların sərbəst şəkildə fəaliyyət göstərdiyini, ölkə vətəndaşlarının hüquq və azadlıqlarının qorunduğunu və Azərbaycanın açıq bir cəmiyyət olduğunu, sahibkarların hüquqlarının qorunduğunu görmək istəmir”- deyə deputat qeyd edib.

A.Mirzəzadənin sözlərinə görə, “Human Rights Watch” və digər bu tipli xarici qeyri-hökumət təşkilatları Azərbaycanı Afrikanın geridə qalmış ölkələri səviyyəsində olmasını arzu edərdilər.

“Birmənalı bilinməlidir ki, Azərbaycan xalqı öz taleyini özü həll edir. Ölkəmiz hüquqi və demokratik prinsiplərlə yaşayan dövlətdir. Hər hansı bir təşkilatın Azərbaycan dövlətinin onun diqtəsi ilə yaşamasına çalışması mükün olmayacaqdır.

Hesab edirəm ki, demokratiya və insan hüquqları ilə bağlı məsələyə bu təşkilat ilk öncə özündən başlamalıdır”.

AzVision.az