Həbsxanalarda vərəmdən ölənlərin sayı kəskin azalıb

   Həbsxanalarda vərəmdən ölənlərin sayı kəskin azalıb
  14 Mart 2019    Oxunub:3050
“Penitensiar müəssisələrdə vərəmlə mübarizə ilə bağlı əldə olunan nəticələr yüksəkdir. Ümumdünya Səhiyyə Təşkilatının müxtəlif dövrlərdə keçirdiyi monitorinqlər də bunu təsdiqləyir”
Azvision.az xəbər verir ki, bunu Milli Məclisdə “Ümumdünya Vərəmlə Mübarizə Gününə həsr edilən dinləmədə Ədliyyə Nazirliyinin Tibb baş idarəsinin rəisi Rəfail Mehdiyev deyib.

Onun sözlərinə görə, hazırda penitensiar müəssisələrdə vərəmlə xəstələnmə faizi aşağı səviyyədədir: “Ölüm faizi 2018-ci ildə 1995-ci illə müqayisədə 126, 2005-ci illə müqayisədə 11, 2015-ci illə müqayisəfə 2 dəfə az olub” .

İdarə rəisi qeyd edib ki, vərəmlə yanaşı, digər xəstəliklərlə də mübarizə aparmaq lazımdır: “Şəxs immun sistemini zədələyən digər xəstəliklərə də yoluxanda vərəmi müalicə etmək çətin olur. Bu gün penitensiar müəssisələrdə vərəm özü-özülüyündə tək bir patologiya kimi problem deyil. Cəzaçəkmə müəssisələrində həm vərəm, həm də hepatit olan kontingentə rast gəlinir. Bu zaman mübarizə aparmaq çətindir. Biz bu xəstəliyin hər ikisi ilə mübarizə aparmalıyıq. Vərəm və İİV-in müalicəsi istiqamətində biz beynəlxalq layihələr vasitəsilə əlavə vəsait cəlb edə bilirik. Hepatitlə bağlı isə biz buna nail ola bilmirik. İllərdir ki, beynəlxalq fond bununla bağlı danışır, amma uğurlu layihələr görə bilmirik. Bu il bizim ixtisaslaşmış müalicə müəssisəsində həm vərəm, həm hepatit, həm də İİV virusuna yoluxan 3 nəfər vəfat edib”.

R.Mehdiyev vurğulayıb ki, insanların sağlamlığı üçün bağçalarda, ictimai iaşə müəssisələrində işləyən şəxslərə çox ciddi tibbi nəzarət olmalıdır.

Elvin Abdulqədirov
Azvision.az


Teqlər: Ədliyyə-Nazirliyi  





Xəbər lenti