Tarixi şəxsiyyətlərin portretini gözübağlı çəkən azərbaycanlı müəllim - FOTOLAR
Vüsal Cabbarov Lənkəranda orta məktəblərdən birində tarix müəllimi işləyir. O, ixtisasca tarixçi olsa da, gözübağlı rəsmlər çəkməklə Ginnesin Rekordlar kitabına düşməyi planlaşdırır.
- Vüsal müəllim, istərdim özünüzü oxucularımıza daha yaxından təqdim edəsiniz.
- 1979-cu ilin sentyabrın 17-də Lənkaranda ziyalı ailəsində anadan olmuşam. İlk rəssamlıq təhsilimi atamdan almışam. 1990-cı ildə Lənkaran şəhər uşaq rəssamlıq məktəbinə daxil olmuşam. 1994-cü ildə oranı əla qiymətlərlə bitirmişəm. 1996-cı ildə Sütəmurdov kənd orta məktəbini bitirib, Əli bəy Hüseynzadə adına Azərbaycan Dövlət Mədəniyyət və İncəsənət Universitetinin sənətşünaslıq fakültəsinə qəbul olmuşam. Daha sonra Lənkaran Dövlət Universitetinin tarix fakültəsinə daxil olmuşam. 2002-ci ildən orta məktəbdə tarix müəllimi işləyirəm. Bir çox rəsm müsabiqələrinin qalibiyəm. Həm də idmanın futbol növü ilə peşəkar məşğul olmuşam. Özümü belə təqdim edərdim - rəssam, heykəltaraş, tarixçi, tədqiqatçı, coğrafiyaşünas, xəritəşünas, reklamçı- dizayner və gözübağlı tarixi şəxsiyyətlərin portretini çəkən insan. Gözübağlı dünya xəritəsini çəkmək üzrə Ginnesin Rekordlar Kitabına namizədəm.
- Ailəlisinizmi?
- Bəli, iki oğlum var.
- Nə zamandan bəri gözübağlı rəsm çəkirsiniz?
- Bir dəfə jurnalist mənə sual verdi ki, belə sürətli rəsmlər çəkirsən. Bəs gözübağlı işləyə bilərsənmi? Dedim, bəli. Təxminən bir il olar. O vaxtdan gözübağlı neçə portret işləmişəm.
- İndiyədək kimlərin portretini çəkmisiniz?
- Nizami Gəncəvinin, Şah İsmayıl Xətainin, Məhəmməd Füzulinin portretini gözübağli çəkirəm. Öz ideyalarımdır, təkrar deyil. Rəssamlıqda öz üslubumu yaratmışam. Dünya rəssamlıq tarixində belə bir şey yoxdur.
- Bu hansı üslubdur ki?
- Cızma üslubudur. Cızma üslubunun əsasını qoymuşam. Bir- birinin əksinə işləyən ştrixlərlə portret çəkirəm.
-Rəsmlərinizi satışa çıxarmaq fikriniz varmı?
- İdeyalarıma əsaslanan rəsmləri satmıram. Ehtiyacım olsa da, onları satmağa əlim gəlmir. Amma sifarişlər olanda çəkib sata bilirəm.
Şahanə Rəhimli
Azvision.az
Teqlər: Rəssam