UNESCO-nun iclasına Azərbaycan sədrlik etdi

  11 Mart 2014    Oxunub : 305
UNESCO-nun iclasına Azərbaycan sədrlik etdi
UNESCO-nun qərargahında Bədən Tərbiyəsi və İdman üzrə Hökumətlərarası Komitənin (CİGEPS) Daimi Məşvərətçi Şura (PCC) ilə birgə iclası keçirilib.
Sessiyada ölkəmizi İdman və Gənclər Nazirliyinin və UNESCO yanında daimi nümayəndəliyin əməkdaşları təmsil ediblər.

CİGEPS-in 18 üzvünün və 11 müşahidəçi ölkənin təmsilçilərinin və PCC-nin 20 nümayəndəsinin iştirak etdikləri iclas UNESCO-nun baş direktorunun müraciəti ilə açılılb.

İclasın gündəliyinə uyğun olaraq seçkilər keçirilmiş, Azərbaycan, Türkiyə, İordaniya, İran İslam Respublikası və Zambiya növbəti iki il müddətində CİGEPS-in sədr müavinləri, Kubanın nümayəndəsi isə sədr seçilib.

Kuba nümayəndəsi üzrlü səbəbdən iclası tərk etdiyi üçün ilk gün plenar sessiyaya Azərbaycan sədrlik edib.

Sessiya zamanı CİGEPS-in üzvləri və PCC-nin ekspertləri CİGEPS-in 2012-ci ildə keçirilən plenar sessiyasından sonrakı dövrdə idman və bədən tərbiyəsi üzrə nazirlərin toplantısında təsdiq olunmuş 3 mövzu ətrafında ( “İdmanın hər kəsin fundamental hüququ kimi qəbul olunması”, “Bədən tərbiyəsi və idman proqramlarının təşviq olunması” və ”İdmanda bütövlüyün qorunması” ) ölkələr və təşkilatlar tərəfindən həyata keçirilmiş nümunəvi və praktiki təcrübə barədə geniş və ətraflı hesabatlar təqdim olunub.

Yığıncaqda Azərbaycan İdman və Gənclər Nazirliyinin əməkdaşı ölkəmizdə idmanda bütövlüyün qorunması və son iki il ərzində görünmüş işlər barədə müfəssəl hesabat təqdim edib. Hesabat iştirakçılar tərəfindən maraqla qarşılanıb.

Sessiyada UNESCO-nun idman və bədən tərbiyəsi ilə bağlı təqdimatları komitə üzvlərinin diqqətinə çatdırılmış, təqdimatlar ətrafında fəal debatlar aparılıb. (AzərTac)

Teqlər: