AzVision.az xəbər verir ki, digər fənlər üzrə toplular kimi, kimya toplusuna da TQDK-nın test bankından 1994-2013-cü illərdə müxtəlif təyinatlı imtahanlarda – ali və orta ixtisas təhsili müəssisələrinə, hərbi məktəblərə, hərbi liseylərə qəbul və sınaq imtahanlarında istifadə olunmuş test tapşırıqları, habelə “Abituriyent” jurnalının ayrı-ayrı saylarında dərc edilmiş model testlər daxildir. Bundan əlavə, hər topludakı test tapşırıqlarının 20-25 faizi heç bir imtahanda istifadə olunmamış test tapşırıqlarıdır. Hər bir toplu test bankında olan test tapşırıqlarının bütün modellərini əhatə edir. Bu tapşırıqlar aktiv bankın bir hissəsidir və onların gələcəkdə imtahan¬lara düşməsi istisna olunmur.

Toplular nəşrə hazırlanarkən test tapşırıqları dərslik, tədris və qəbul proqramlarındakı dəyişiklik və yeniliklər nəzərə alınmaqla bir daha ekspertizadan keçirilib, həm məzmun, həm də formaca təkmilləşdirilib.

Test topluları testologiyaya maraq göstərənlər üçün dəyərli örnək, mənbə rolunu oynayır, ölkədə, region müəllimləri də daxil olmaqla, test tərtibi ilə məşğul olan mütəxəssislərin sayının artmasına imkan yaradır.

Fənn müəllimləri və metodistlər təlim prosesində bank testlərindən biliyin qiymətləndirilməsi üçün istifadə edə bilirlər.
Abituriyentlər öyrəndikləri bilikləri bank testləri vasitəsi ilə yoxlamaq imkanı əldə edirlər. Testlər üzərində iş onların imtahana həm də psixoloji hazırlığında əhəmiyyətli rol oynayır.
Hər bir müəllim bu testlər vasitəsilə həm də öz peşə hazırlığını yoxlamaq və artırmaq imkanı əldə edir.

Bank testlərindən həmçinin ümumtəhsil məktəblərinin buraxılış imtahanlarında test modelləri kimi istifadə ediləcəkdir.
Test toplularında tapşırıqların düzgün cavabları da verilmişdir. Bundan məqsəd şagird və abituriyentlərə testlərlə müstəqil surətdə, repetitor köməyinə müraciət etmədən işləmək imkanının yaradılmasıdır.

Vəsaitləri TQDK-nın binası qarşısındakı "Abituriyent" köşkündən almaq və ya www.abiturient.az saytından sifariş etmək olar.
Qeyd edək ki, Tələbə Qəbulu üzrə Dövlət Komissiyası artıq riyaziyyat, fizika və biologiya fənləri üzrə test topluları Azərbaycan və rus dillərində böyük tirajla çap edərək şagird və abituriyentlərin istifadəsinə verib.

Fatimə Kərimli