AzVision.az xəbər verir ki, ABŞ-nin Maliyyə naziri Janet Yellen İranın altı milyard dollarlıq aktivləri blokdan çıxarıldıqdan sonra HƏMAS-ın İsrailə hücumu ilə bağlı tənqidlərə cavab olaraq, bu resursların toxunulmaz qaldığını və Birləşmiş Ştatların HƏMAS-ın maliyyə mənbələrinə çıxışını kəsmək üçün də tədbirlər gördüyünü vurğulayıb.

Ötən ay İran həbsxanalarında olan beş amerikalının azadlığa buraxılması müqabilində Tehranın Cənubi Koreyadakı dondurulmuş hesablarından altı milyard dollarlıq sərvəti Qətər banklarına köçürülüb.

Oktyabrın 7-də HƏMAS qruplaşmasının İsrailə qarşı ən azı 1400 nəfərin ölümü ilə nəticələnən hücumlarından sonra Co Bayden hökumətinin əleyhdarları həmin pulların Qətərə köçürülməsini çox sərt şəkildə tənqid ediblər.

Ötən həftə ABŞ-nin Maliyyə nazirliyi HƏMAS rəsmilərinə qarşı, dünən isə SEPAH-a və yenidən HƏMAS-a qarşı yeni sanksiyalar tətbiq edib.
AzVision.az