Bu barədə RİA Novosti-yə Türkiyə Böyük Millət Məclisindəki (parlament) mənbə məlumat verib. Mənbə bildirib ki, qərarı yenidən gecikdirə biləcək hər hansı insident baş verməzsə İsveçin quruma üzvlüyü həll olunacaq.

Türkiyə Parlamentinin Xarici Əlaqələr Komitəsinin rəhbəri Fuat Oktay isə bildirib ki, Ankara İsveçin NATO-ya üzvlüyünü təsdiqləməyə tələsməyəcək. O qeyd edib ki, müvafiq komitə bu məsələni “öz prioritetləri çərçivəsində” müzakirə edəcək.

Oqtay vurğulayıb ki, İsveçin Şimali Atlantika Müqaviləsi Təşkilatına üzvlük məsələsi bəzi digər dövlətlər kimi Türkiyə üçün də aktual deyil. O, əmin edib ki, “vaxtı gələndə” parlament bu məsələni müzakirə edəcək.

Qeyd edək ki, İsveç Rusiyanın Ukraynadakı əməliyyatına görə Finlandiya ilə birlikdə 2022-ci ildə NATO-ya üzvlük üçün müraciət edib. 4 aprel 2023-cü ildə Finlandiya rəsmi olaraq alyansa üzv oldu. İsveçin girişi Stokholmda Quranın yandırılması hadisəsi və Türkiyənin bu məsələdə mövqeyinə görə gecikib.

Macarıstan Türkiyə ilə birlikdə İsveçin alyansa qoşulmasına hələ razı olmayan sonuncu NATO üzvüdür. 2023-cü ilin oktyabrında Türkiyə İsveçə qarşı ritorikasını yumşaldıb və Türkiyə prezidenti Rəcəb Tayyib Ərdoğan şəxsən ratifikasiya protokolunu parlamentə təqdim edib.

AzVision.az