Belə ki, Milli Seçki Palatası bülletenlərin 88 faizinin işlənməsi barədə məlumatları dərc edib. Məlumata əsasən seçicilərin 55,91 faizi Mileyə səs verib. Artıq Argentinanın iqtisadiyyat naziri Serxio Massa prezident seçkilərindəki rəqibi Xavyer Mileyin qələbəsini tanıyıb.

"Mən Xavyer Mileyi təbrik etmək üçün onunla əlaqə saxladım və uğurlar arzuladım, çünki o, argentinalıların əksəriyyətinin növbəti 4 il üçün seçdiyi Prezidentdir", - Massa deyib.

Mileyin özü isə bildirib ki, Argentinanın köklü islahatlara və dövlətin geniş yayılmış rolundan uzaqlaşmasına ehtiyacı var. Respublikanın kritik vəziyyətdə olduğunu vurğulayan Miley dövlət başçısı seçilən kimi ilk çıxışında deyib: “Ölkənin köklü dəyişikliklərə ehtiyacı var. Tədricliyə, qərarsızlığa, yarımçıqlığa yer yoxdur”.

Mileyin sözlərinə görə, onun qələbəsi ilə Argentina “tarixin yeni səhifəsini” açır. “Bu gün bəzilərinə fayda verən, lakin argentinalıların əksəriyyətinin əziyyət çəkdiyi yoxsulluğa səbəb olan, hərtərəfli dövlət modelinin sonudur”, - deyə yeni Prezident vurğulayıb.

Ölkədəki seçki məntəqələri noyabrın 20-də yerli vaxtla saat 18:00-da (Bakı vaxtı ilə saat 01:00) bağlanıb. Rəsmi nəticələr saat 21:00-dan sonra (Bakı vaxtı ilə saat 04:00) açıqlanmalıdır.

Xavyer Miley dövlətin həyata minimal müdaxiləsinin tərəfdarıdır. O, Mərkəzi Bankı ləğv etməyi planlaşdırır və milli valyutanın dollarla əvəzlənməsini təklif edir. Siyasətçi iqtisadi problemlərin həlli üçün büdcə xərclərini də ciddi şəkildə azaltmaq niyyətindədir. Miley Braziliya, Çin və Rusiya siyasətləri ilə razılaşmadığı üçün dövlətlərarası münasibətləri inkişaf etdirmək niyyətində deyil, lakin o, özəl biznesin bu ölkələrlə qarşılıqlı əlaqəsinə mane olmayacaq.

AzVision.az