İcbari Tibbi Sığorta Agentliyindən AzVision.az-a verilən məlumata görə, Mingəçevir Dövlət Dram Teatrının və Yevlax Kukla Xalq Teatrının aktyorları maraqlı proqramla uşaqları əyləndiriblər. Xəstəxana rəhbərlikləri tərəfindən stasionarda qalan uşaqlara hədiyyələr verilib.

Mingəçevir Uşaq Nevroloji sanatoriyasında təşkil edilən bayram şənliyində Mingəçevir şəhər icra hakimiyyətinin başçısı Niyazi Bayramov da iştirak edib. Tədbirdə çıxış edən Mingəçevir şəhər Mərkəzi Xəstəxanasının direktoru Könül Ələkbərov bildirib ki, sanatoriyada qalan uşaqların asudə vaxtlarının səmərəli və maraqlı keçirilməsini təmin etmək məqsədi ilə quruma televizor və peyk antenası hədiyyə verilib.

Bundan başqa, fizioterapiya kabineti müvafiq tibbi heyət ilə təmin edilib. İcbari tibbi sığortanın tətbiq olunduğu müddətdə 4 anadangəlmə ürək-qüsurlu uşaq əməliyyat olunub.

Uşaqların Beynəlxalq Müdafiəsi Gününə həsr olunmuş tədbirlər çərçivəsində Mingəçevir şəhəri vətəndaşlıq vəziyyəti aktlarının qeydiyyatı şöbəsinin rəhbərliyi 1 iyun tarixində doğulan körpələrin valideynlərinə doğum haqqında şəhadətnamələri xəstəxanada təqdim edib.

Yevlax rayon Mərkəzi Xəstəxanasının direktoru Azər İsmayılov bildirib ki, icbari tibbi sığortanın tətbiqi müddətində 86 uşağa müalicə, müayinə və əməliyyat üçün digər tibb müəssisələrinə göndəriş verilib. Yevlax rayonunda rəsmi qeydiyyatda olan 13 uşaq icbari tibbi sığorta çərçivəsində həyati vacib, dəyəri yüksək olan əməliyyat olunub.

Xəstəxananın direktoru bildirib ki, icbari tibbi sığortanın pilot layihəsi çərçivəsində uşaqlar qayğı ilə əhatə olunublar: “Ana və uşaqların sağlamlığının qorunması dövlətimizin ən prioritet istiqamətlərindən biridir. İcbari tibbi siğortanın baza zərfində 1829 tibbi xidmət vardır ki, pilot ərazilərdə qeydiyyatda olan digər əhali qrupları kimi uşaqlar da bu xidmətlərdən pulsuz yararlanırlar”.

Aytən Zəhra
AzVision.az