Deputatın mandatının ləğv olunması haqda: "Prezident necə məsləhət görübsə, elə də olmalıdır"

  08 Avqust 2017    Oxunub : 11699
Deputatın mandatının ləğv olunması haqda: "Prezident necə məsləhət görübsə, elə də olmalıdır"
Milli Məclisin İntizam komissiyası növbəti dəfə qalmaqallı fikirlər səsləndirən deputat Astan Şahverdiyevə görə toplanacaq. Belə bir açıqlama ilə Milli Məclisin İntizam komissiyasının sədri Ağacan Abıyev çıxış edib. O, bildirib ki, səsləndirdiyi fikirlərlə tənqid hədəfinə tuş gələn Astan Şahverdiyevlə bağlı sentyabrda komissiya üzvləri bir araya gələcək. Şahverdiyevin dputat mandatının əlindən alınacağı istisna deyil.
Qalmaqallı deputat Astan Şahverdiyev mandatının ləğv olunacağı ilə bağlı AzVision.az-a açıqlamasında deyib ki, ona bu barədə rəsmi məlumat verilməyib.

“İntizam Komissiyasının nə üçün toplandığı mənə məlum deyil. İnternetdə yazılanlara görə Ağacan Əbiyev bəyanat verib ki, İntizam Komissiyası sentyabrın 5-dən sonra yığışacaq. Hələlik mənə heç kim bu barədə məlumat verməyib. Bəlkə də bu, kiminsə fantaziyasıdır. Ona görə heç nə deyə bilmərəm”.

Deputat mandatından məhrum olunacağı ilə bağlı məsələyə gəlincə, A.Şahverdiyev deyib:

““Milli Məclis deputatının etik davranış qaydaları haqqında” qanun müzakirə olunaraq qəbul edilib. Prezident İlham Əliyev sərəncamı ilə onu təsdiq edib. Prezidentin sərəncamı müzakirə olunmur. Prezident necə məsləhət görübsə, elə də olmalıdır. Sərəncama əsasən nə qərar veriləcəksə, ona tabe olmağa hazıram. Mən sözümü İntizam Komissiyasının iclasına çağırılsam, orada deyəcəyəm”.

Elvin Abdulqədirov
AzVision.az

Teqlər: Astan-Şahverdiyev