"Düzünü desəm, oktyabrın 7-dən sonra baş verənlərdən heç kim danışmır. Təəssüf ki, 13 min fələstinli - uşaqlar, qadınlar, qocalar öldürüldü. Qəzza zolağından heç nə qalmayıb", - Ərdoğan Berlində Almaniya kansleri Olaf Şolzla birgə mətbuat konfransında deyib.

Ərdoğan: İsrail HƏMAS-dan daha çox girov saxlayır

Türkiyə prezidenti bildirib ki, İsrailin nüvə silahı var, lakin Təl-Əviv bunu tetiraf etmir.

"İndi İsrailin nüvə silahı varmı? Var, amma İsraildən soruşsan, "hə" deməyəcəklər. Çünki yalandan çox yaxşı istifadə edirlər".

Qeyd edək ki, HƏMAS-ın elan etdiyi Əl-Əqsa tufanı əməliyyatı çərçivəsində oktyabrın 7-də İsrail Qəzza zolağından görünməmiş miqyaslı raket hücumuna məruz qalıb.

Bundan sonra təşkilatın döyüşçüləri İsrailin cənubundakı sərhəd bölgələrinə daxil olub, burada həm hərbçilərə, həm də mülki şəxslərə atəş açıb, həmçinin 200-dən çox insanı girov götürüb.

İsraildə səlahiyyətlilərin son məlumatlarına görə, təxminən 1,2 min adam öldürülüb. Bu rəqəmə mülki vətəndaşlar, əsgərlər, xarici vətəndaşlar və işçilər daxildir və 5 mindən çox yaralı olduğu da bildirilir.

Buna cavab olaraq İsrail Müdafiə Qüvvələri Qəzza zolağında HƏMAS-a qarşı "Dəmir Qılınclar" əməliyyatına başlayıb. Bir neçə gün ərzində İsrail hərbçiləri Qəzza ilə sərhədə yaxın bütün məskunlaşan əraziləri nəzarətə götürüb və zolağındakı hədəflərə hava zərbələri endirməyə başlayıb. İsrail həmçinin Qəzza zolağının tam blokadaya alındığını elan edib.

Oktyabrın sonunda İsrailin anklavda əməliyyatının quru mərhələsi başlayıb. Qəzza şəhəri İsrail quru qüvvələri tərəfindən mühasirəyə alınıb və anklav faktiki olaraq cənub və şimal hissələrə bölünüb. İsrailin Qəzza zolağına endirdiyi zərbələr nəticəsində ölənlərin sayı 11,5 mini keçib, 29 mindən çox insan yaralanıb.

Şahanə Rəhimli
AzVision.az