Yeni Azərbaycan Partiyası İdarə Heyətinin iclası keçirilib. Partiyanın mətbuat xidmətindən AzVision.az-a verilən məlumata görə, iclasda YAP İdarə Heyətinin 2013-cü ilə dair illik hesabatı, Yeni Azərbaycan Partiyasının tərkibi, Qadınlar Şurası və Gənclər Birliyinin tərkibi haqqında 2013-cü ilə dair illik statistik hesabat, partiyanın 2013-cü il üzrə maliyyə hesabatı və İdarə Heyətinin 2014-cü ilin birinci yarımilliyinə dair iş planı müzakirə edilib.

Baş nazirin müavini, YAP Sədrinin müavini – icra katibi Əli Əhmədov iclasın gündəliyində olan məsələlər barədə geniş çıxış edib. O, bildirib ki, ötən 2013-cü il Azərbaycan Respublikasının ictimai-siyasi və sosial-iqtisadi həyatında mühüm və əhəmiyyətli illərdən biri olub. Keçirilən prezident seçkilərində Azərbaycan xalqının böyük əksəriyyəti Prezident İlham Əliyevə səs verməklə həyata keçirilən siyasi xəttin davamlı olmasını bir daha dəstəkləyib.

Qeyd olunub ki, keçən ilin iyun ayında YAP-ın V Qurultayında partiyanın Sədri İlham Əliyevin prezidentliyə namizədliyi yekdilliklə qəbul olunub və Yeni Azərbaycan Partiyası prezident seçkiləri kampaniyasında fəal iştirak edərək, seçicilərlə çoxsaylı görüşlər keçirib.

Yeni Azərbaycan Partiyası beynəlxalq əlaqələr sahəsində geniş və çoxşaxəli fəaliyyət göstərib. Xüsusilə müxtəlif ölkələrin aparıcı partiyaları və demokratik təsisatları ilə Yeni Azərbaycan Partiyası arasında işgüzar və səmimi münasibətlər qurulmuş, səmərəli və yaddaqalan görüşlər keçirilib, o cümlədən YAP müxtəlif layihələrə ev sahibliyi edib. Hesabat dövrü ərzində partiyanın nümayəndə heyəti bir sıra xarici səfərlərdə olub, müxtəlif beynəlxalq təşkilatlar və partiyalararası qurumlarla əlaqələrin genişlənməsi istiqamətində mühüm addımlar atılıb.

Çıxışlarda bildirilib ki, Yeni Azərbaycan Partiyasının sıralarının hesabat dövrü ərzində 31 min 600 nəfərdən çox yeni üzv qəbul edilib və beləliklə, partiyanın üzvlərinin sayı 620 min nəfəri keçib. Partiyaya daxil olanların sırasında gənclər və qadınlar üstünlük təşkil edir.

İdarə Heyətinin iclasında YAP-ın ötən ilə dair maliyyə hesabatı dinlənilib. Bildirilib ki, 2013-cü ildə Yeni Azərbaycan Partiyasının gəlirləri 7 016 790 manat olub. Bunun 5 720 849 manatını üzvlük haqlarından, 29 306 manatını partiya vəsiqələrinin haqlarının ödənilməsindən, 121 510 manatını depozitdən əldə olunan daxilolmalar, 1 145 125 manatını büdcədən ayrılan vəsait təşkil edib. Partiya üzvlük haqlarının 80%-dən çoxu Yeni Azərbaycan Partiyasının rayon və şəhər təşkilatlarının hesabında qalıb və onların maliyyə xərclərinin ödənilməsinə sərf edilib.

Yeni Azərbaycan Partiyasının hesabına daxil olan maliyyə vəsaitinin 3 046 769 manatı partiyanın İcra Katibliyinin və yerli təşkilatlarının əməkdaşlarının əmək haqqının ödənilməsinə, 1 554 712 manatı partiya və onun yerli təşkilatlarının, gənclər və qadınlar təşkilatlarının keçirdiyi tədbirlərinin, o cümlədən partiya qurultayının, iki beynəlxalq konfransın, gənclər üçün təşkil edilən yay və qış məktəblərinin və digər tədbirlərin maliyyələşməsinə, 254 510 manatı ezamiyyə xərclərinə, 319 699 manatı invertarların alınmasına, 117 495 manatı təmir işlərinə, 93 307 manatı çap işlərinə, 382 152 manatı kommunal və təsərrüfat xərclərinə, 53 919 manatı dəftərxana xərclərinə, 45 023 manatı xeyriyyə tədbirlərinə, 57 614 manatı əlavə dəyər vergisinə, 33 694 manatı həmkarlar təşkilatına, 150 550 manatı yanacaq və avtomobillərə xidmət işlərinə, 54 190 manatı bank xidmətinə, 85 016 manatı isə sair xərclərə sərf edilib.

Beləliklə, Yeni Azərbaycan Partiyasının cəmi xərcləri 6 248 650 manat təşkil edib. Hesabat ilinin sonuna toplanan vəsaitin 768 140 manatı partiyanın və yerli təşkilatlarının hesabında qalıb.
İdarə Heyətinin iclasının gündəliyində duran məsələlər geniş müzakirə olunduqdan sonra, YAP İdarə Heyətinin 2013-cü ilə dair hesabatı, illik statistik hesabat, partiyanın maliyyə hesabatı və İdarə Heyətinin 2014-cü ilin birinci yarımilliyinə dair planı qəbul olunub.

Şəhanə Rəhimli