Sumqayıt Tibb Mərkəzinin direktoru Elnur Azadxanov media-tur zamanı bildirib ki, ilk olaraq 1 nömrəli Xəstəxananın Poliklinika şöbəsində tibbi xidmətin keyfiyyətinin artırılması, yaranan növbələrin aradan qaldırılması istiqamətində xidmət yenidən qurulub:

“Poliklinika şöbəsində pasiyentlərin məmnunluğunun artırılması məqsədilə xidmət 4 hissədə aparılır.  Belə ki, burada dislokasiya dəyişdirilərək imtiyazlı, cərrahi, kardioloji və nevroloji, həmçinin digər ixtisas həkimlərinin fəaliyyət göstərdiyi hissələrə ayrılıb.  

Artıq imtiyazlı xəstələrin (şəkərli diabet) digər vətəndaşlarla birlikdə növbə gözləməsinə ehtiyac yaranmır, onların endokrinoloji  kabinetlərdə müayinələrdən keçərək  rahat hərəkəti təmin olunub”.

E.Azadxanov əlavə edib ki, həssas qruplardan olan vətəndaşlara, o cümlədən şəhid ailələri və qazilərə xüsusi ayrılmış hissədə Mərkəzin mütəxəssisi tərəfindən xidmət göstərilir:

“Nevroloji hissədə artıq yeni Elektromioqrafiya (EMQ) kabineti də qurulub. Bununla yanaşı, Elektroensefaloqrafiya (EEQ) xidməti də vətəndaşların ixtiyarındadır. Kardioloji hissədə isə Elektrokardioqrafiya (EKQ), Exokardioqrafiya (EXO), Tredmil testi və Holter kabinetlərində müayinələr aparılır.

Eyni zamanda Poliklinika şöbəsində vətəndaşların rahatlığı üçün yeni istiqamətləndirici lövhələr quraşdırılıb.

Bununla da Poliklinika şöbəsində aparılan yeniliklər sayəsində əhaliyə göstərilən xidmətin səviyyəsi artırılıb”.

Həmidə İbrahimova
AzVision.az